თბილისის ინფექციურმა საავადმყოფომ პაციენტების მიღება განაახლა. ინფორმაცია საავადმყოფოს სამედიცინო დირექტორმა მარინა ეზუგბაიამ დღევანდელ ბრიფინგზე გაავრცელა.
მისი განცხადებით, დაახლოებით, 3 კვირაში ფუნქციონირებას განახლებული ბოქსირებული განყოფილებაც დაიწყებს.
“გუშინ, დღის მეორე ნახევარში, ორ კორპუსში აივ ინფიცირებული პაციენტების მიღება და ერთ კორპუსში კოვიდ-19-ით ინფიცირებული პაციენტების მიღება განვაახლეთ. ჩვენი ძირითადი ბაზა კოვიდ-19-ისთვის ბოქსირებული განყოფილება გახლავთ, მაგრამ ბოქსირებულ განყოფილებაში ჯერ ინტენსიურად მიდის სამუშაოები და იმედი გვაქვს, რომ მაქსიმუმ, 3 კვირაში მიწოდების ყველა სერვისი გაიმართება და ბოქსირებული განყოფილებაც გააგრძელებს კოვიდ-19-ით ინფიცირებული პაციენტების მიღებას”, – თქვა ეზუგბაიამ.
