დღევანდელი დილა ოკუპირებულ აფხაზეთში მცხოვრებ მოსახლეობას ასეთი გაფრთხილებით გაუთენდა: აფხაზეთის ტერიტორიაზე გამოცხადებულია უპილოტო აპარატების საფრთხე…
აფხაზეთში „უპილოტო საფრთხის“ რეჟიმი და საჰაერო განგაშები ყოველდღიურობად იქცა. ე.წ. თავდაცვის უწყება მოსახლეობას საგანგებო ინსტრუქციებით მიმართავს – უკრაინული დრონების აქტიურობამ საოკუპაციო ხაზს მიღმა უსაფრთხოების ილუზია საბოლოოდ გააქარწყლა.
საგანგებო რეჟიმი არცთუ იშიათად ცხადდება და ე.წ. თავდაცვის უწყება იძულებულია ადგილობრივ მცხოვრებლებს უსაფრთხოების მკაცრი წესების დაცვა სთხოვოს.
ამ ოფიციალურ მიმართვებში მოქალაქეებს შემდეგი მითითებების შესრულებას სთხოვენ: დაუყოვნებლივ დატოვეთ ღია ადგილები და გადაადგილდით მინიმუმ 100 მეტრის დაშორებით უახლოესი შენობების ან ხეების საფარქვეშ; ნუ დარჩებით საფრენი აპარატის პირდაპირი ხედვის არეალში; გააფრთხილეთ გარშემომყოფები მოსალოდნელი საფრთხის შესახებ; ნუ შეეცდებით აპარატის ჩამოგდებას იმპროვიზებული საშუალებებით და კატეგორიულად მოერიდეთ ჩამოგდებული დრონების ნამსხვრევებთან შეხებას.
ეს განგაშები და შეზღუდვები პირდაპირ კავშირშია იმ სამხედრო ინფრასტრუქტურასთან, რომელსაც რუსეთის ფედერაცია საქართველოს ოკუპირებულ ტერიტორიაზე წლებია ავითარებს.
მაგალითად, ოჩამჩირის პორტი ამჟამად მოქმედებს, როგორც რუსეთის შავი ზღვის ფლოტის მცირე დამხმარე და ტექნიკური უზრუნველყოფის პუნქტი. ნოვოროსიისკზე უკრაინული თავდასხმების შემდეგ, რუსეთმა სწორედ ოჩამჩირეში დროებით გადაისროლა სამაშველო-საბუქსირე გემები და მცირე ლოგისტიკური აპარატები.
მარტში მომხდარი ინციდენტის დროს, აფხაზეთის ცაზე ერთდროულად 30-მდე უკრაინული დრონი დაფიქსირდა, რაც საოკუპაციო რეჟიმის ე.წ-მა შეიარაღებული ძალების სარდალმა, გენერალ-ლეიტენანტმა ადგურ გუმბამ ოფიციალურად დაადასტურა, თუმცა თქვა, რომ დრონების სამიზნე რეალურად არა აფხაზეთი, არამედ სოჭი იყო.
უკრაინაში რუსეთის ომის დაწყებიდან მალევე თავად ვოლოდიმირ ზელენსკიმ სწორედ აფხაზეთთან მიმართებაში განაცხადა, – „ჩვენ მათ ყველგან მივწვდებით“. უკრაინის სამხედრო დაზვერვის ხელმძღვანელობამაც დაადასტურა, რომ საერთაშორისო სამართლით აფხაზეთი საქართველოს ტერიტორიაა, თუმცა იქ განთავსებული ნებისმიერი რუსული სამხედრო ობიექტი, რომელიც უკრაინის წინააღმდეგ გამოიყენება, ავტომატურად ხდება უკრაინის შეიარაღებული ძალების ლეგიტიმური სამიზნე.
შექმნილი ვითარებით მოსახლეობა სერიოზულად არის შეშფოთებული, რაც სოციალური ქსელებიდანაც ჩანს.
ერთ-ერთი ასეთი შემთხვევის დროს, სოფელ პაკუაშში დრონის ნამსხვრევებმა მაღალი ძაბვის ელექტროგადამცემი ხაზები დააზიანა, რამაც რამდენიმე სოფლის სრული პარალიზება და ენერგოკრიზისი გამოიწვია. გარდა ამისა, დრონების აქტივობის ტალღის დროს პერიოდულად იკეტება რუსეთთან დამაკავშირებელი ფსოუს სასაზღვრო გამშვები პუნქტიც. ადგილობრივ სოციალურ ქსელებსა და ფორუმებზე მოსახლეობა სულ უფრო ხშირად გამოთქვამს შეშფოთებას იმის გამო, რომ მოსკოვის მიერ აღთქმული „უსაფრთხოების გარანტიები“ რეალურად არ მუშაობს და უკრაინაში რუსეთის ომის გამო ოკუპირებული ტერიტორიის მცხოვრებლებს სიმშვიდე დაერღვათ.
