Ryanair-ის თვითმფრინავში, რომელიც საბერძნეთიდან გერმანიის მიმართულებით მიფრინავდა, ფრენის დროს ილუმინატორი ჩაიმსხვრა და ფანჯარასთან მჯდომი მგზავრი მასში შეითრია. მედიის ცნობით, Boeing-ის ფანჯარა ძრავიდან მოწყვეტილმა დეტალმა ჩაამსხვრია.ამის შესახებ თვითმხილველებმა პარასკევს, 10 ივლისს, ბერძნულ რადიოსადგურ Radio Thessaloniki-სა და გერმანულ სააგენტო dpa-ს განუცხადეს.
მათი თქმით, 61 წლის სერბეთის მოქალაქის თავი და მხრები თვითმფრინავის გარეთ აღმოჩნდა, და რამდენიმე მგზავრმა დიდი ძალისხმევით შეძლო მისი სალონში შეკავება. თვითმფრინავში, რომელიც სალონიკიდან სამხრეთ გერმანიის ქალაქ მემინგენისკენ მიფრინავდა, ჟანგბადის ნიღბები ჩამოვარდა. პილოტმა ფრენა შეწყვიტა და გამგზავრების აეროპორტში დაბრუნდა.
დაშავებული მგზავრი სასწრაფო დახმარების მანქანით სალონიკის საავადმყოფოში გადაიყვანეს. მას სერიოზული დაზიანებები არ მიუღია. დანარჩენი მგზავრები გერმანიაში სათადარიგო თვითმფრინავმა ჩაიყვანა.
ბერძნული მედიის ცნობით, ინციდენტი 10 ივლისის დილით, ჩრდილოეთ მაკედონიის თავზე, 6 ათასი მეტრის სიმაღლეზე მოხდა, Boeing 737-800-ის ტიპის ლაინერში. ბერძნული გამოცემა ERT წერს, რომ ფანჯარა თვითმფრინავის ძრავიდან მოწყვეტილმა დეტალმა დააზიანა. მომხდარზე გამოძიება დაიწყო.
Ryanair-ში მხოლოდ ის განაცხადეს, რომ აფრენიდან მალევე ლაინერის სამგზავრო ილუმინატორი გატყდა და სალონში ჰერმეტულობა დაიკარგა.
2018 წელს, მსგავს ვითარებაში, აშშ-ში Southwest Airlines-ის მგზავრი დაიღუპა.
მას შემდეგ, რაც ძრავის ვენტილატორის ფრთის მოწყვეტის შედეგად თვითმფრინავის ფიუზელაჟი დაზიანდა, ქალი სალონიდან ნაწილობრივ გაიწოვა.
სხვა მგზავრებმა ჯენიფერ რიორდანის თვითმფრინავში დაბრუნება შეძლეს. ავარიული დაშვების შემდეგ ის საავადმყოფოში გადაიყვანეს, თუმცა ექიმებმა მისი სიცოცხლის გადარჩენა ვერ შეძლეს.
