რუსეთის ხელისუფლება განიხილავს საბჭოთა კავშირში მოქმედი გასვლითი ვიზების პრაქტიკის დაბრუნების შესაძლებლობას, წერს Telegram-არხი „Можем объяснить“.
გამოცემის ინფორმაციით, შესაბამისი კანონის შემუშავებით რუსეთის საგარეო საქმეთა სამინისტროა დაკავებული.
გასვლითი ვიზების შემოღებისთვის საჭირო დოკუმენტების პაკეტი საზღვარგარეთ მოქალაქეების „უსაფრთხოების“ გაძლიერების საბაბით მზადდება, განუცხადა „МО“-ს რუსულ დიპლომატიურ წრეებში წყარომ. ეს ინფორმაცია დაადასტურა პრეზიდენტის ადმინისტრაციასთან დაახლოებულმა წყარომაც.
არხის წყაროების თქმით, განიხილება წინადადება, რომლის მიხედვითაც „არამეგობრულ“ ქვეყნებში რუსები გამგზავრებას მხოლოდ ორგანიზებული ჯგუფებით შეძლებენ — არანაკლებ 10 ადამიანის შემადგენლობით, თანმხლებ პირთან ერთად და წინასწარ დამტკიცებული მარშრუტით.
ინდივიდუალური ტურიზმი შესაძლოა სხვა ქვეყნებში იყოს დაშვებული — მათი სია ჯერ განსაზღვრული არ არის. თუმცა ამ შემთხვევაშიც საჭირო იქნება გასვლითი ვიზა, წერს „МО“ ერთ-ერთ წყაროზე დაყრდნობით:
„ისე, როგორც ახლაა — იყიდე ბილეთი და გაფრინდი — აღარ უნდა იყოს. ნებართვა სახელმწიფომ უნდა გასცეს“.
ამ წლის თებერვალში გავრცელდა ინფორმაცია, რომ რუსეთმა უკვე შეზღუდა მეცნიერების გამგზავრება „არამეგობრულ“ ქვეყნებში: განათლებისა და მეცნიერების სამინისტრომ ფედერალურ საგანმანათლებლო და სამეცნიერო ორგანიზაციებს გაუგზავნა წერილი, რომელშიც რიგ უცხო ქვეყნებში გამართულ ღონისძიებებზე „შესაძლო პოლიტიზაციის თვალსაზრისით საფუძვლიანი შეფასების“ ჩატარებას ითხოვდა.
რუსეთის საგარეო საქმეთა სამინისტრო გასვლითი ვიზების შემოღებისთვის მზადებას უარყოფს
რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა ამტკიცებს, რომ ინფორმაცია გასვლითი ვიზების შემოღების შესახებ კანონპროექტის მომზადებაზე სიმართლეს არ შეესაბამება.
შესაბამის ცნობებს მან РБК-სთან ინტერვიუში „სისულელე“ და „უცხოეთის აგენტობის კლასიკა“ უწოდა.
რუსეთის იუსტიციის სამინისტრომ პროექტი „Можем объяснить“ „უცხოეთის აგენტების“ რეესტრში 2023 წლის დეკემბერში შეიყვანა.
