დღეს, 13:00 საათზე, ალეკო ელისაშვილი მეოთხე აბსურდულ ბრალს მოისმენს. ოპოზიციონერ პოლიტიკოსზე გრძელდება პოლიტიკური ნიშნით ანგარიშსწორება, – ამის შესახებ „ძლიერი საქართველო-ლელოს“ ერთ-ერთმა ლიდერმა ქეთევან თურაზაშვილმა განაცხადა.
„საზოგადოებას შევახსენებთ, რომ ჯერ იყო პროვოკაცია ალეკო ელისაშვილის წინააღმდეგ ვინმე ბაბაევის გამოყენებით. შემდეგ, პოლიტიკური აქტის განხორციელების გამო, შუშის ჩამტვრევის და 320-ლარიანი ზარალის გამო, ალეკო ელისაშვილს ტერორისტობა დაბრალეს და 13-წლიანი პატიმრობა მიუსაჯეს. საზოგადოებას ალეკოს ტერორისტობა რომ ვერ დააჯერეს, ე.წ. ძაღლების საქმე შეკერეს, სადაც ერთადერთ მოწმედ არარსებული ძაღლი დაიმოწმეს. მტკიცებულებების არარსებობის გამო, საქმე თაროზე შემოდეს და ამ აბსურდულ საქმეს ეფექტურად იყენებენ იმისთვის, რომ ოპოზიციონერი პოლიტიკოსი კვლავ ვერ შეხვდეს ოჯახის წევრებს. „ოცნებამ“, როცა დაინახა, რომ ალეკოს მიმართ ყველაზე კრიტიკულად განწყობილმა ადამიანმაც კი არ დაიჯერა მისი ტერორისტობა, კიდევ ახალი ბრალი შემოგვთავაზეს, თითქოს, ოპოზიციონერმა პოლიტიკოსმა სასამართლო შეურაცხყო. შეგახსენებთ, იმ სასამართლოს შეურაცხყოფას ედავებიან, რომელმაც ოპოზიციონერ პოლიტიკოსს ტერორისტობა დააბრალა და 13 წლით გაუშვა ციხეში. მივმართავ „ქართულ ოცნებას“ და ყველას, ვინც ასრულებს „ქართული ოცნების“ უკანონო დავალებებს, ყველას მოგიწვეთ პასუხისგება კანონის და სამართლიანი სასამართლოს წინაშე“, – განაცხადა თურაზაშვილმა.
