ჰამასმა პარასკევს განაცხადა, რომ დათანხმდა ისრაელთან ომის დასრულების შეთანხმებას, რომელიც მოიცავს ჯგუფის განიარაღებისა და ისრაელის ძალების ეტაპობრივი გაყვანის დებულებებს.
დონალდ ტრამპმა Truth Social-ზე გამოქვეყნებულ პოსტში შეთანხმება „მონუმენტურ ნაბიჯად“ შეაფასა და აღნიშნა, რომ პროცესი „ყურადღებით სტრუქტურირებულ ეტაპებად“ განხორციელდება. მისი თქმით, ამან უნდა უზრუნველყოს გადასვლა მისი 20-პუნქტიანი სამშვიდობო გეგმის მომდევნო ფაზაზე. პროცესის დასრულების კონკრეტული ვადა დასახელებული არ არის.
შეთანხმება, აშშ-ის შუამდგომლობით 2025 წლის ოქტომბერში ხელმოწერილი ცეცხლის შეწყვეტიდან ცხრა თვის შემდეგ, ითვალისწინებს, რომ ღაზას მართვას მომავალში ახალი პალესტინური მთავრობა განახორციელებს, რომელიც ითანამშრომლებს ე.წ. მშვიდობის საბჭოსთან (Board of Peace) — ტრამპის მიერ შექმნილ სტრუქტურასთან, რომელსაც ღაზას აღდგენის ზედამხედველობა ევალება დიდი ბრიტანეთის ყოფილი პრემიერ-მინისტრის ტონი ბლერის ხელმძღვანელობით.
ჰამასის მოლაპარაკებების დელეგაციის წევრმა ღაზი ჰამადმა განაცხადა, რომ განიარაღების პროცესის დაწყება დამოკიდებულია ისრაელის ღაზადან გასვლასა და ტერიტორიის აღდგენის პროგრესზე. მისივე თქმით, ჯგუფი განიარაღებას ისრაელის ჯარების სრული გაყვანის გარეშე არ დაიწყებს.
Al Jazeera-ს ხელთ არსებული შეთანხმების ასლის მიხედვით, განიარაღების ზუსტი გეგმა 14 დღის განმავლობაში უნდა შემუშავდეს. დოკუმენტის თანახმად, პროცესი დაიწყება ღაზაში ეროვნული კომიტეტისა (National Committee for the Administration of Gaza) და საერთაშორისო სტაბილიზაციის ძალების შესვლით, ხოლო შეგროვებული იარაღი არც ისრაელს და არც სხვა არაპალესტინურ სტრუქტურას არ გადაეცემა — მისი შენახვის კონტროლი ეროვნულ კომიტეტს დარჩება.
ომმა ღაზაში, რომელიც 2023 წლის 7 ოქტომბერს ჰამასის სამხრეთ ისრაელში შეჭრის საპასუხოდ დაიწყო, ღაზას ჯანდაცვის სამინისტროს მონაცემებით, სულ მცირე 73,000 პალესტინელი მსხვერპლი მოიტანა, მათგან დაახლოებით 1,200 — ცეცხლის შეწყვეტის შემდეგ.
„პალესტინის ისლამურმა ჯიჰადმა“, ღაზაში მოქმედმა კიდევ ერთმა შეიარაღებულმა დაჯგუფებამ, ფრაქციებსა და ისრაელს შორის შეთანხმების შესახებ გავრცელებული ცნობები არაზუსტად შეაფასა.
