„ქოცხროვა“ ამზადებს დიდ ღალატს – „გეორგიევსკის ტრაქტატის“ მოხმობით ამზადებენ ქართული სახელმწიფოს გაუქმებას – ამის შესახებ მიხეილ სააკაშვილი სოპციალურ ქსელში წერს და ამბობს, რომ „ოცნება“ საქართველოს განადგურების „დამამთავრებელ ეტაპზეა გადასული“.
„იმ ფონზე, როცა უკრაინამ ძალიან წარმატებული დარტყმა განახორციელა ნოვოსიბირსკის სამხედრო პორტზე – 4 გემია სერიოზული დაზიანებით (იმედია იმავეს გააკეთებს ოჩამჩირის და გუდაუთის ბაზის მისამართით) და ასევე იმ ფონზე, რომ ივანიშვილი აფხაზეთის გავლით ბენზინს აწვდის რუსეთს, „ქოცხროვა“ აშკარად ამზადებს ძალიან დიდ ღალატს.
„გეორგიევსკის ტრაქტატის“, რომელმაც ბოლო მოუღო ქართულ სახელმწიფოებრიობას, მოხმობით ამზადებენ სიმწრით შექმნილი დღევანდელი ქართული სახელმწიფოს გაუქმებას.
ამ სიტუაციაში საერთოდ არანაირი მნიშვნელობა არ აქვს პარტიულ კუთვნილებას ან პოლიტიკურ და პიროვნულ განსხვავებებს – ყველა პატრიოტი ერთად უნდა დადგეს, უნდა შევქმნათ საერთო ეროვნული გადარჩენის ტალღა და წავლეკოთ ესენი, თუ არადა ისინი უკვე საქართველოს განადგურების დამამთავრებელ ეტაპზე არიან გადასულები და შემდეგ, ზოგმა უსამშობლოდ დარჩენილმა ემიგრაციაში, ზოგმა კი ციხეში ვარკვიოთ ერთმანეთთან ურთიერთობები და ვიძახოთ – „შენ რომ მაშინ ეს არ გააკეთე, შენ რომ ესე თქვი“ და სხვა უშინაარსო გარჩევები ვაწარმოოთ“, – წერს სააკაშვილი.
ირაკლი კობახიძემ 12 აგვისტოს განაცხადა, რომ ერეკლე მეორემ „გეორგიევსკის ტრაქტატის” ხელმოწერით ქვეყანა გადაარჩინა.
„ამ დოკუმენტმა ჩვენი სახელმწიფოს და ქვეყნის გადარჩენაში უმნიშვნელოვანესი როლი შეასრულა… ვიდრე ერეკლე მეორე ცოცხალი იყო, მან შეთანხმების დაცვა ბოლომდე უზრუნველყო… როდესაც ერეკლე მეორე გარდაიცვალა, სამწუხაროდ, სხვანაირად განვითარდა მოვლენები“ – თქვა კობახიძემ.