მზის სრული დაბნელება, რომელიც 2026 წლის 12 აგვისტოს მოხდა, XXI საუკუნის პირველი სრული დაბნელება იყო ევროპის უდიდესი ნაწილისთვის. ამ მოვლენის დროს მთვარემ მზის დისკო მთლიანად დაფარა, რამაც დღისით რამდენიმე წუთით სრული სიბნელე გამოიწვია.
მზის დაბნელების მაქსიმალური წერტილი დაფიქსირდა ატლანტის ოკეანის ჩრდილოეთ ნაწილში, ისლანდიის დასავლეთ სანაპიროსთან, სადაც სრულმა ფაზამ 2 წუთსა და 18 წამს გასტანა. ხმელეთზე მაქსიმალური დაფარვის ხილვადობის მხრივ ყველაზე ხელსაყრელი ადგილები იყო ისლანდიის დასავლეთი რეგიონები, მათ შორის რეიკიავიკი და გრენლანდიის აღმოსავლეთი სანაპირო.ეს ციური საოცრება სხვადასხვა რეგიონში სხვადასხვანაირად გამოჩნდა.
ისლანდია იყო პირველი ევროპული ქვეყანა, რომელსაც სრულმა ჩრდილმა გადაუარა. კუნძულის დასავლეთ ნაწილში, მათ შორის დედაქალაქ რეიკიავიკში, მზის დისკო 100%-ით სრულად დაიფარა. ეს იყო პირველი მზის სრული დაბნელება ისლანდიისთვის 1954 წლის შემდეგ, ხოლო რეიკიავიკისთვის — ბოლო 593 წლის მანძილზე. სწორედ ისლანდიის დასავლეთ სანაპიროსთან, ატლანტის ოკეანეში, დაფიქსირდა ამ დაბნელების მაქსიმალური წერტილი, სადაც სრულმა სიბნელემ ყველაზე დიდხანს გასტანა.
მზის სრული დაბნელება დაფიქსირდა ესპანეთშიც. ჩრდილის ზოლმა ქვეყნის ჩრდილო-დასავლეთიდან (გალისია) ბალეარის კუნძულებამდე გადაიარა. მოვლენა დაემთხვა მზის ჩასვლის პროცესს რამაც ცაზე ულამაზესი ოქროსფერი და მეწამული ფერების კომბინაცია შექმნა. ქვეყანამ დაახლოებით 1,5 მილიონზე მეტი შიდა და გარე ტურისტი მიიღო სპეციალურად მოწყობილ სადამკვირვებლო პუნქტებში.
მთვარემ მზე ნაწილობრივ დაფარა ლონდონში. პიკი ადგილობრივი დროით 19:13 საათზე დაფიქსირდა. ვინაიდან მზე უკვე დაბლა იყო დასავლეთის ჰორიზონტზე, ქალაქის ცათამბჯენებისა და პარკების ფონზე შთამბეჭდავი ხედები გადაიშალა, რამაც ქუჩებში ათასობით ადამიანი გამოიყვანა. პიკის მომენტში ცაზე მზისგან მხოლოდ ძალიან თხელი, გამოკვეთილი რკალი დარჩა, რომელსაც ასტრონომებმა „ღიმილის ფორმის“ ან „ამოტრიალებული ნამგლის“ ფორმის მზე უწოდეს.
სტადიონის ეკრანზე აჩვენეს ნაწილობრივი დაბნელება „პსჟ“-სა და „ასტონ ვილას“ შორის მატჩის მაყურებლებს ზალცბურგში. სანამ გუნდები ევროპის პირველი ტიტულისთვის იბრძოდნენ, ცაზე ბუნებრივი სინათლე მკვეთრად შემცირდა. სტადიონის გიგანტურ ეკრანებზე მატჩის პარალელურად ნაწილობრივი დაბნელების პირდაპირი ტრანსლაცია ჩართეს, რამაც გულშემატკივრებში დიდი ოვაციები გამოიწვია
რუსეთში ყველაზე თვალსაჩინო სანახაობა პეტერბურგში იყო. საღამოს 21:00 საათისთვის მთვარემ მზის 79% დაფარა. მზის ნამგლისებრი ფორმა იდეალურად გამოჩნდა ნევის სანაპიროებიდან და ისტორიული შენობების გუმბათების ფონზე. მიუხედავად იმისა, რომ სრული სიბნელე არ დამდგარა, ქალაქში შინდისფერი, არაბუნებრივი ბინდი ჩამოწვა. ათასობით ადამიანი შეიკრიბა ღია სივრცეებში — ფინეთის ყურის სანაპიროზე, სანქტ-პეტერბურგის დამბაზე, სესტრორეცკის პლაჟებსა და ცათამბჯენ „ლახტა ცენტრის“ სათვალთვალო მოედანზე.
და ბოლოს, ფოტო კოსმოსიდან, რომელიც კოსმონავტმა პეტრე დუბროვმა საერთაშორისო კოსმოსური სადგურის ბორტიდან გადაიღო.
მზის დაბნელება ხდება მაშინ, როდესაც მთვარე მზესა და დედამიწას შორის მოექცევა. ამ დროს სამივე ციური სხეული სწორ ხაზზე განლაგდება, მთვარე ბლოკავს მზის სხივებს და დედამიწის ზედაპირზე თავის ჩრდილს აფენს.
შემდეგი მსგავსი მასშტაბის მზის სრული დაბნელება ევროპაში 2027 წლის 2 აგვისტოსაა მოსალოდნელი, რომელიც სამხრეთ ესპანეთისა და ჩრდილოეთ აფრიკის ცას დააბნელებს
