აშშ-ის ყოფილ პრეზიდენტის, ჯო ბაიდენის პროსტატის კიბომ მრავლობითი მეტასტაზები წარმოქმნა, რომლებიც ძვლებსა და სხვა ორგანოებში გავრცელდა, რაც 83 წლის ყოფილ პოლიტიკოსს ძლიერ ტკივილს აყენებს. ამის შესახებ მისმა შვილმა, ჰანტერ ბაიდენმა BBC-სთვის მიცემულ ინტერვიუში განაცხადა, რომელიც კვირას, 9 აგვისტოს გამოქვეყნდა.მისი თქმით, ავადმყოფობის მიუხედავად, 83 წლის ყოფილი პრეზიდენტი კვლავ აქტიურ ცხოვრებას აგრძელებს.
„ერთადერთი, რაც ახლა შემიძლია მამაჩემის ჯანმრთელობის მდგომარეობაზე ვთქვა, ის არის, რომ ვისურვებდი, უფრო მეტად ჩიოდეს, რადგან მას ნამდვილად ძალიან უჭირს, — განაცხადა ჰანტერ ბაიდენმა. — ეს ძალიან მტკივნეული და დამქანცველია. თუმცა ის კვლავ აქტიურია“.
მან ასევე გაიხსენა 2024 წლის ივნისში, საპრეზიდენტო კამპანიის დროს გამართული დებატები, რომლებიც ჯო ბაიდენისთვის წარუმატებელი აღმოჩნდა და რის შემდეგაც დემოკრატიულმა პარტიამ გადაწყვიტა, საპრეზიდენტო კანდიდატად ის კამალა ჰარისით ჩაენაცვლებინა.
მანამდე ჰანტერ ბაიდენი აცხადებდა, რომ იმ პერიოდში ხანგრძლივმა მოგზაურობებმა მამამისი ფიზიკურად გამოფიტა. ახლა კი, მისი თქმით, თავადაც ფიქრობს, ხომ არ ახდენდა უკვე მაშინ ჯო ბაიდენზე გავლენას დაავადება, რომელიც იმ დროს ვითარდებოდა.
ჯო ბაიდენის ონკოლოგიური დაავადებები
2025 წლის მაისში ცნობილი გახდა, რომ ჯო ბაიდენს პროსტატის კიბო დაუდგინდა. The New York Times-ის ინფორმაციით, 82 წლის პოლიტიკოსს დიაგნოზი მას შემდეგ დაუსვეს, რაც შარდვასთან დაკავშირებული პრობლემების გამო ექიმებმა გასინჯეს და პროსტატაზე „პატარა კვანძი“ აღმოაჩინეს.
უკვე იმ დროისთვის ექიმებმა დაადგინეს, რომ სიმსივნეს აგრესიული ფორმა ჰქონდა და ძვლებში მეტასტაზები იყო გავრცელებული, წერდა NYT.
აშშ-ის მოქმედმა პრეზიდენტმა დონალდ ტრამპმა მაშინ გამოთქვა ვარაუდი, რომ შესაძლოა ბაიდენის დიაგნოზს მალავდნენ, რადგან, მისი თქმით, დაავადებას „ასეთ სტადიამდე მისასვლელად დიდი დრო სჭირდება“. ყოფილი პრეზიდენტის წარმომადგენლებმა ეს ბრალდება უარყვეს. ტრამპმა თავის წინამორბედს სწრაფი გამოჯანმრთელება უსურვა.
2025 წლის სექტემბერში ჯო ბაიდენის გარემოცვამ ასევე გაავრცელა ინფორმაცია, რომ ყოფილ პოლიტიკოსს კანის კიბოს გამო ოპერაცია ჩაუტარდა.
2023 წელს, როდესაც ბაიდენი პრეზიდენტის თანამდებობას იკავებდა, მას უკვე ამოკვეთეს კანის ავთვისებიანი სიმსივნე. როგორც მისმა პირადმა ექიმმა, კევინ ო’კონორმა განაცხადა, იმ ეტაპზე დამატებითი მკურნალობა საჭირო არ გამხდარა.
