SpaceX-ის მფლობელმა ილონ მასკმა უკრაინას უარი უთხრა Starlink-ის გამოყენებაზე რუსეთის სიღრმეში მდებარე სარაკეტო გამშვებ დანადგარებზე დარტყმებისთვის. ამის შესახებ ამერიკული გამოცემა The Atlantic ინფორმირებულ წყაროებზე დაყრდნობით წერს.
გამოცემის ცნობით, უკრაინის თავდაცვის ყოფილი მინისტრი მიხაილო ფედოროვი არაოფიციალური არხებით ცდილობდა ილონ მასკის დარწმუნებას, რომ უკრაინის შეიარაღებული ძალებისთვის Starlink-ის რუსეთის ტერიტორიაზე სამიზნეების დასაზუსტებლად გამოყენების უფლება მიეცა. თუმცა, როგორც The Atlantic წერს, „ამ ეტაპზე დადებითი გადაწყვეტილება არ არის“.
მასკი მიიჩნევს, რომ ასეთი ნაბიჯი ომის შემდგომ ესკალაციას გამოიწვევს და მოსკოვსა და კიევს შორის „შეთანხმების მიღწევას“ ემხრობა.
ივლისში მასკმა The Economist-თან ინტერვიუში განაცხადა, რომ რუსეთი უკრაინიდან ჯარების გაყვანას არ აპირებს და ომის შეჩერება მხოლოდ კრემლისთვის გარკვეული დათმობების შემდეგ იქნება შესაძლებელი.
ამჟამად უკრაინის შეიარაღებულ ძალებს Starlink-ის გამოყენებით რუსეთის ობიექტებზე იერიშის მიტანა მხოლოდ უკრაინის საერთაშორისოდ აღიარებული ტერიტორიის ფარგლებში შეუძლიათ, მათ შორის რუსეთის მიერ ანექსირებულ ყირიმსა და ოკუპირებულ ტერიტორიებზე.
მასკმა ზელენსკისთან შეხვედრაზეც უარი თქვა
The Atlantic-ის ადრინდელი ინფორმაციით, უკრაინის პრეზიდენტმა ვოლოდიმირ ზელენსკიმ 28 ივლისს ვაშინგტონში დონალდ ტრამპთან შეხვედრისას სთხოვა მას, დაერწმუნებინა ილონ მასკი, რომ უკრაინის შეიარაღებული ძალებისთვის რუსეთის სიღრმეში მდებარე სამიზნეებზე დრონებით დარტყმისას Starlink-ის გამოყენების უფლება მიეცა.
ზელენსკიმ თხოვნა იმით ახსნა, რომ უკრაინა მომავალ ზამთარში რუსეთის მხრიდან ენერგეტიკულ ინფრასტრუქტურაზე შეტევების გაძლიერებას ელოდება. მისი აზრით, Starlink-ის გამოყენების შესაძლებლობა უკრაინას საშუალებას მისცემდა, რუსეთის სარაკეტო გამშვები დანადგარები ჯერ კიდევ ბალისტიკური რაკეტების გაშვებამდე გაენადგურებინა.
ასეთი შესაძლებლობა, ამასთანავე, კიევის დამოკიდებულებას შეამცირებდა დეფიციტური Patriot-ის რაკეტა-გადამჭერების მიწოდებაზე.
The Atlantic-ის ცნობით, ტრამპი ზელენსკის დაჰპირდა, რომ მის თხოვნას განიხილავდა. თავად ილონ მასკმა კი ზელენსკისთან შეხვედრაზე უარი თქვა.
