ესპანეთის ქალაქ ესტეპონაში აღმოჩენილი „წამების ოთახის“ საქმეში საქართველოს მოქალაქეების მონაწილეობა, რაზეც გუშინ ესპანური გამოცემები წერდნენ, როგორც ირკვევა მცდარი ინფორმაცია აღმოჩნდა.
21 სექტემბერს გავლენიანი ესპანური საგამოძიებო გამოცემის, El Español-ის მიერ გავრცელებულ ექსკლუზიურ მასალაში სწორედ საქართველოს მოქალაქეების მონაწილეობაზე და მათ დაკავებაზე იყო საუბარი.
თუმცა საქართველოს შინაგან საქმეთა სამინისტროში დღეს განაცხადეს, რომ ესპანეთში დაკავებულებს შორის არც საქართველოს მოქალაქეები და არც ეთნიკურად ქართველები არ არიან.
ესპანური მედია მომხდარზე დღესაც წერს, თუმცა ამჯერად სტატიებში საქართველოს მოქალაქეები აღარ არიან ნახსენები და საუბარია დანაშაულში სერბეთის მოქალაქეების მონაწილეობაზე. მათი ინფორმაციით დაკავებული 7 პირი სწორედ სერბეთის რესპუბლიკის მოქალაქეა. ესპანური გამოძიება მათ ახასიათებს, როგორც მაღალი დონის ორგანიზებულ, შეიარაღებულ კრიმინალურ დაჯგუფებას, რომელიც ანდალუსიის რეგიონში კოკაინის მსხვილ პარტიებს აკონტროლებდა.
ესპანეთის ეროვნული პოლიციის მთავარი ვერსიით, საქმე ეხება კლასიკურ კრიმინალურ ანგარიშსწორებას და სერბულმა კლანმა ესპანელი და მაროკოელი მამაკაცები მძევლად აიყვანა იმის გამო, რომ მათ სერბების კუთვნილი კოკაინის მსხვილი პარტია მოიპარეს ან ნარკოტიკების რეალიზაციიდან მიღებული თანხის დავალიანება ჰქონდათ. ე.წ. „წამების ოთახში“ სერბები მათგან ითხოვდნენ ინფორმაციას, თუ სად მალავდნენ წაღებულ ნარკოტიკებს ან ფულს. კედლები კი იმიტომ იყო ცელოფნით დაფარული, რომ წამების შემდეგ სისხლის კვალი მარტივად ჩამოერეცხათ და კრიმინალისტებისთვის დნმ-ის ნიმუშები არ დაეტოვებინათ.