„ამერიკულმა ონლაინ საინფორმაციო-ანალიტიკურმა გამოცემა Eurasianet-მა სტატია გამოაქვეყნა ღარიბაშვილის წერილებსა და ივანიშვილის გუნდში არსებულ დაპირისპირებაზე. გამოცემა წერს, რომ ღარიბაშვილის ბრალდებები ხელისუფლების ზედა ეშელონებში გააფთრებულ შიდა ბრძოლაზე მიუთითებს.
“ქართველმა „ციხის ჩიტმა“ სიმღერა დაიწყო და ქვეყნის პოლიტიკურ იმპრესარიოს, მილიარდერ ბიძინა ივანიშვილს, ასევე სხვა მაღალჩინოსნებს ადანაშაულებს იმაში, რომ კორუფციის საქმეზე განტევების ვაცად აქციეს.
საქართველოს ყოფილი პრემიერ-მინისტრი ირაკლი ღარიბაშვილი იანვარში ფულის გათეთრების ბრალდებით გასამართლების შემდეგ ციხეში ზის. აგვისტოს შუა რიცხვებში მან გადაწყვიტა, დუმილი დაერღვია და სოციალურ ქსელში განცხადება გამოაქვეყნა, რომელშიც მმართველი „ქართული ოცნების“ ლიდერები დაადანაშაულა, რომ „ივანიშვილის დავალებით“ მასზე ზეწოლას ახორციელებდნენ და მამხილებელი განცხადებების გაკეთებას აიძულებდნენ.
პირველ განცხადებას ღარიბაშვილმა მეორე, უკვე ნამდვილი „ბომბის ეფექტის“ მქონე პოსტი მოაყოლა, რომელშიც თქვა, რომ ხელისუფლების სახელობითი ანტიკორუფციული კამპანია სპეციალურად მის „დასაპატიმრებლად და პოლიტიკურად გასანადგურებლად“ იყო შეკერილი. მისი თქმით, აქამდე დუმდა ივანიშვილისა და „ქართული ოცნების“ ისტებლიშმენტისადმი ერთგულების გამო.
„ყველაფერი გავაკეთე იმისთვის, რომ თავიდან ამეცილებინა დაპირისპირება ჩემს გუნდთან და ჩემთვის ძვირფას ადამიანთან. სწორედ ამიტომ უარი ვთქვი სამართლებრივ ბრძოლაზე და დავემორჩილე პროცესს, რომელიც პირადად ჩემთვის გამანადგურებელი იყო — მხოლოდ იმისთვის, რომ სახელმწიფოსა და გუნდის ინტერესებისთვის ზიანი არ მიმეყენებინა“, — დაწერა მან.
ღარიბაშვილის მონაყოლით, ივლისში „ქართული ოცნების“ შუამავალმა მას ციხეში წერილი მიუტანა, რომელშიც, როგორც თავად ამბობს, სთხოვდნენ, იანვრის საქმეზე საჯაროდ ეღიარებინა დანაშაული. იმ დროისთვის მას უკვე გაფორმებული ჰქონდა საპროცესო შეთანხმება, რაც დანაშაულის ფაქტობრივ აღიარებას ნიშნავდა, თუმცა საჯაროდ და პირდაპირ დანაშაული არასდროს უღიარებია.
ღარიბაშვილის ვერსიით, წერილის მიზანი იყო, იძულებული გაეხადათ, საკუთარ თავზე აეღო დანაშაული, რომელიც, მისი თქმით, არ ჩაუდენია, და ამით მისთვის პოლიტიკაში დაბრუნების ნებისმიერი გზა საბოლოოდ ჩაეკეტათ.
მისივე თქმით, ამ მოთხოვნამ გადაკვეთა „წითელი ხაზი, რომელმაც მაიძულა, ჩემს ცხოვრებაში ყველაზე რთული ნაბიჯი გადამედგა… მაიძულებენ, ბრძოლა დავიწყო“.
„ქართული ოცნების“ საპასუხო დარტყმას დიდხანს არ დაუგვიანია. აგვისტოს ბოლოს პროკურატურამ ღარიბაშვილს ახალი კორუფციული ბრალდება წარუდგინა — მას თითქმის 300 000 ევროს ჯიბეში ჩადებას ედავებიან, სანაცვლოდ კი, გამოძიების ვერსიით, თავდაცვის სფეროში გარკვეული კონტრაქტების „მოგვარებაში“ უნდა დახმარებოდა.
ღარიბაშვილის ამ „ყველაფრის მომყოლი“ წერილები რამდენიმე მიზეზითაა საყურადღებო. ერთ დროს ის ივანიშვილის ყველაზე სანდო ლეიტენანტად მიიჩნეოდა. ღარიბაშვილი ორჯერ იყო საქართველოს პრემიერ-მინისტრი — 2013-2015 და 2021-2024 წლებში — ხოლო ამ ორ პერიოდს შორის, 2019-2021 წლებში, თავდაცვის მინისტრის პოსტს იკავებდა.
მისი დაცემა იმის დასტურია, რომ „ქართული ოცნების“ ხელმძღვანელობაში არავინ უნდა გრძნობდეს თავს უსაფრთხოდ — არც თანამდებობის და, როგორც ჩანს, არც თავისუფლების მხრივ.
ეს ეპიზოდი „ქართული ოცნების“ შიდა სამზარეულოსაც აშიშვლებს — გვაჩვენებს ფრაქციულ ბრძოლებსა და გავლენის სფეროებისთვის ომს, სადაც დამარცხებულისთვის შედეგი შესაძლოა პოლიტიკურად სასიკვდილო აღმოჩნდეს. ამავე დროს, ეს ყველაფერი მიანიშნებს, რომ კულისებს მიღმა ივანიშვილის გავლენა პრაქტიკულად აბსოლუტურია.
ხელისუფლების მაღალჩინოსნებმა ღარიბაშვილის განცხადებებს ცეცხლი დაუშინეს. თბილისის მერმა კახა კალაძემ ღარიბაშვილის მოთხოვნა, რომ საქმეზე ოფიციალური გამოძიება დაწყებულიყო, ხელის ერთი მოსმით უარყო.
„წერილებში გაჟღერებული ბრალდებები… სრულიად უსაფუძვლოა და ყოფილი თანაგუნდელის პოლიტიკური სპეკულაციაა“, — განუცხადა კალაძემ ჟურნალისტებს სექტემბრის დასაწყისში.
თუმცა ღარიბაშვილი სულაც არ არის ერთადერთი, ვინც „ქართული ოცნების“ შიგნით მიმდინარე ძალაუფლების ომში მსხვერპლად იქცა. იმ ადამიანების სიაში, რომლებიც ოდესღაც ივანიშვილის ერთგულ აკოლიტებად ითვლებოდნენ, დღეს კი მის კეთილგანწყობას ჩამოშორდნენ ან საერთოდ კანონის მეორე მხარეს აღმოჩნდნენ, ყოფილი მინისტრები, დეპუტატები და ბიზნესმენებიც არიან.
საქმე იქამდეც კი მივიდა, რომ ისინი, ვინც ახლა ივანიშვილის „მტრების სიაში“ აღმოჩნდნენ, ერთმანეთის წინააღმდეგ იწყებენ თამაშს — იმ იმედით, რომ ძალაუფლების მთავარ გამნაწილებელს კვლავ მოეწონებიან.
მაგალითად, თავდაცვის ყოფილ მინისტრ ჯუანშერ ბურჭულაძეს ცოტა ხნის წინ 10-წლიანი სასჯელი 5 წლამდე შეუმცირეს, საიდანაც ორი წელი შინაპატიმრობაში უნდა გაატაროს. როგორც ჩანს, შეღავათი ღარიბაშვილის წინააღმდეგ მიცემული ჩვენების სანაცვლოდ მიიღო — ჩვენების, რომელიც ახალი კორუფციული ბრალდების გამყარებას ემსახურება.
ამასობაში, სახელმწიფო უსაფრთხოების სამსახურის ყოფილ უფროსს, გრიგოლ ლილუაშვილს, 16 სექტემბერს 13 წლით თავისუფლების აღკვეთა მიუსაჯეს მას შემდეგ, რაც კორუფციასთან დაკავშირებულ ოთხ ეპიზოდში დამნაშავედ ცნეს.“– წერს