კომპანია „გაზპრომნეფტის“ კუთვნილმა მოსკოვის ნავთობგადამამუშავებელმა ქარხანამ მუშაობა დროებით შეაჩერა. მიზეზი 20 სექტემბერს უკრაინული უპილოტო საფრენი აპარატებით განხორციელებული თავდასხმის შედეგად ნავთობის პირველადი გადამუშავების დანადგარებზე გაჩენილი ხანძრები გახდა. ამის შესახებ ორშაბათს, 21 სექტემბერს, Reuters-ი იუწყება, ნავთობგადამამუშავებელ ინდუსტრიაში სამ წყაროზე დაყრდნობით.
20 სექტემბერს მოსკოვის მერმა სერგეი სობიანინმა Telegram-ში დაწერა უპილოტო საფრენი აპარატებით განხორციელებული მასშტაბური თავდასხმის შესახებ. მისი ინფორმაციით, რამდენიმე დრონმა „მოსკოვის ნავთობგადამამუშავებელი ქარხნის ტერიტორიამდე მიაღწია“.
ხანძრები ნავთობის პირველადი გადამუშავების დანადგარებზე
Reuters-ის წყაროების თქმით, დრონების ჩამოვარდნის შედეგად ხანძარი ნავთობის პირველადი გადამუშავების ორივე დანადგარზე გაჩნდა. მოწყობილობების შეკეთებას რამდენიმე კვირა დასჭირდება. მასალის გამოქვეყნების მომენტისთვის „გაზპრომნეფტს“ ჟურნალისტების კომენტარის თხოვნაზე პასუხი არ ჰქონდა გაცემული.
Reuters-ის ცნობით, ქარხნის AVT-6 პირველადი გადამუშავების ბლოკის წარმადობა დღე-ღამეში 21 400 მეტრიკული ტონა ნედლეულია, რაც ნავთობგადამამუშავებელი ქარხნის მთლიანი სიმძლავრის 53%-ს შეადგენს. EURO+ პირველადი გადამუშავების კომბინირებული დანადგარის წარმადობა კი დღე-ღამეში 18 800 ტონაა — ანუ დარჩენილი 47%.
პუბლიკაციაში ასევე აღნიშნულია, რომ 21 სექტემბრიდან მოსკოვის ნავთობგადამამუშავებელი ქარხნის მიერ წარმოებული ნავთობპროდუქტების საბითუმო პარტიები სანქტ-პეტერბურგის საერთაშორისო სასაქონლო-ნედლეულის ბირჟაზე გასაყიდად აღარ გამოუტანიათ.
უკრაინული დრონების თავდასხმების გამო რუსეთში ნავთობგადამამუშავებელი ქარხნების გაჩერება
მოსკოვის ნავთობგადამამუშავებელი ქარხანა უკრაინული უპილოტო საფრენი აპარატების სამიზნე პირველად არ გამხდარა. 18 ივნისის ღამეს განხორციელებული დარტყმის შემდეგაც ქარხანამ მუშაობა დროებით შეაჩერა.
როგორც The Moscow Times აღნიშნავს, მოსკოვის ნავთობგადამამუშავებელი ქარხანა, რომელიც რუსეთის ათ უმსხვილეს ნავთობგადამამუშავებელ საწარმოს შორისაა, სექტემბერში მეხუთე ქარხანა გახდა, რომელმაც უპილოტო საფრენი აპარატების თავდასხმების გამო საწვავის წარმოება შეაჩერა.
„მანამდე მუშაობა შეაჩერა კიდევ ორმა მსხვილმა ქარხანამ, რომლებიც დედაქალაქის რეგიონს ამარაგებენ — „იაროსლავნეფტეორგსინთეზმა“ 17 სექტემბერს და „როსნეფტის“ რიაზანის ნავთობგადამამუშავებელმა ქარხანამ — 6 სექტემბერს. გარდა ამისა, 11 და 15 სექტემბერს, შესაბამისად, გაჩერდა „როსნეფტის“ სიზრანისა და სარატოვის ნავთობგადამამუშავებელი ქარხნები, რომელთა საერთო წლიური სიმძლავრე 15 მილიონ ტონას აღემატება“, — ნათქვამია პუბლიკაციაში.