თბილისის საკრებულოს ყოფილი დეპუტატის, ავთანდილ დავითაძის ოჯახი აცხადებს, რომ მათ შვილზე, გიორგი დავითაძეზე, რუსთავის ციხეში ბადრაგების მხრიდან ფიზიკური და ფსიქოლოგიური ძალადობა სისტემატურად ხორციელდება.
ოჯახის ინფორმაციით, ინციდენტი დეკემბერში მოხდა, რა დროსაც ბადრაგის 9 თანამშრომელმა პატიმარი დეესკალაციის ოთახში ჩაიყვანა და მასზე იძალადა.
გიორგის დედა, ირმა დავითაძე ამბობს, რომ ძალადობა პოლიციის მოქმედი თანამშრომლის დავალებით ხდება, რომელსაც გიორგი დავითაძის სისხლის სამართლის საქმეში დაზარალებულის სტატუსი აქვს, და მოითხოვს მის სასწრაფო გადაყვანას სხვა დაწესებულებიდან.
„ეს არის სისტემა, რომელიც დალპა უკვე, ჩამომპალია და დროზე არის ზომები მისაღები… პირდაპირ ვაცხადებ საქვეყნოდ, რომ პასუხს ვაგებინებ ყველა მათგანს, ვინც ჩემს შვილზე იძალადა და დღემდე ძალადობენ“, — განაცხადა ავთანდილ დავითაძემ „ტვ პირველთან“.
გიორგი დავითაძის, ადვოკატის, ირმა ჯანუაშვილის თქმით, შესაბამისი უწყებები ინფორმირებულნი არიან და გამოძიებაც დაწყებულია, თუმცა ციხის თანამშრომლების წინააღმდეგ სისხლის სამართლებრივი დევნა ჯერ არ დაწყებულა. ადვოკატის განცხადებით, ამოღებულია საკნის ვიდეოჩანაწერებიც, სადაც ჩანს, რომ პატიმარი ბადრაგს წინააღმდეგობას არ უწევს, თუმცა მოგვიანებით მასზე ძალადობა მაინც ხორციელდება.
ავტორი: ნინო კოდალაშვილი