უკრაინის პრეზიდენტმა ვოლოდიმირ ზელენსკიმ დაადასტურა რუსეთის მოსკოვის რეგიონში მდებარე „ნავთობის ინდუსტრიის საკვანძო საწარმოსა და ლოგისტიკურ ობიექტზე“ დარტყმები და, მათ შორის, აღნიშნა ტაქტიკური რაკეტა „პელიკანის“ (FP-7) პირველი გამოყენება.
„საუბარია მილიარდობით დოლარზე, რომლებიც სამხედრო მანქანას ამუშავებს. გამოყენებული იყო, მათ შორის, FP-1, RZ-100, MICH-2000, „პალიანიცა“, Vendetta, „ლიუტი“, „ბარსი“, „ფლამინგო“, „სიჩენი“, Pelican“, — ნათქვამია პრეზიდენტის Telegram-ზე კვირას, 20 სექტემბერს გამოქვეყნებულ განცხადებაში.
„მოსკოვმა სხვა რეგიონების ხარჯზე მრავალეშელონიანი საჰაერო თავდაცვის რგოლები კი არ უნდა ააგოს, არამედ თავისი სასტიკი ომი უნდა დაასრულოს და მშვიდობა აირჩიოს. მაგიდაზე დევს დეესკალაციის ზომები — ენერგეტიკისა და სურსათის უსაფრთხოების სფეროებში“, — ასე განმარტა ზელენსკიმ მოსკოვის რეგიონზე, ასევე ვორონეჟის ოლქში მდებარე საწარმოზე განხორციელებული შეტევების მიზნები.
Fire Point-მა შემოდგომაზე რუსეთის სამხედრო-სამრეწველო ობიექტებზე დარტყმები დააანონსა
10 სექტემბერს უკრაინულმა კერძო კომპანია Fire Point-მა რუსეთის ტერიტორიაზე უახლოეს პერიოდში სარაკეტო დარტყმები დააანონსა.
„ტაქტიკურმა რაკეტა FP-7-მა („პელიკანი“ — რედ.) უკვე წარმატებით გაიარა გამოცდის ორი ეტაპი და ახლა საბრძოლო პირობებში შესამოწმებლად ემზადება“, — განაცხადა კომპანიის გენერალურმა დირექტორმა ირინა ტერეხმა პოლონეთში, თავდაცვის გამოფენა MSPO 2026-ზე. მისი თქმით, Fire Point-ის მიერ შექმნილი ბალისტიკური რაკეტები შესაძლოა რუსეთის ტერიტორიაზე არსებულ სამიზნეებს პირველად უკვე „უახლოეს კვირებში“ დაესხას თავს.
მანამდე ტერეხი Reuters-თან ინტერვიუში აცხადებდა, რომ ბალისტიკური რაკეტა „პელიკანი“, რომლის მოქმედების მანძილი 200 კილომეტრამდეა, უკრაინის თავდაცვის სამინისტროში კოდიფიკაციის პროცესს გადის. აღნიშნული მოქმედების მანძილი მოსკოვამდე მიღწევის საშუალებას არ იძლევა. რუსეთის მხრიდან „პელიკანის“ გამოყენებით მოსკოვის რეგიონზე შეტევის დადასტურება არ არსებობს.
ტერეხის თქმით, შემოდგომის ბოლოს Fire Point გეგმავს FP-9-ის საბრძოლო გამოყენების დაწყებას, რომლის მოქმედების მანძილი 850 კილომეტრამდეა. კომპანია ასევე აწარმოებს „ფლამინგოს“ ტიპის რაკეტებს, რომლებსაც უკრაინის შეიარაღებული ძალები უკვე იყენებენ რუსეთის ტერიტორიაზე არსებული სამიზნეების წინააღმდეგ.
FP-7-ს შეუძლია 150 კილოგრამამდე საბრძოლო ქობინის გადატანა. ის ხმელეთიდან გასაშვები სისტემაა, ხოლო რაკეტის მაქსიმალური სიჩქარე 1500 მ/წმ-ს შეადგენს. აპრილში Fire Point-ის დამფუძნებელმა და მთავარმა კონსტრუქტორმა დენის შტილერმანმა Reuters-თან ინტერვიუში ეს რაკეტა ამერიკულ ATACMS სისტემას შეადარა.
უკრაინის გენშტაბმა კაპოტნიაში მდებარე ნავთობგადამამუშავებელი ქარხნის მნიშვნელოვანი დაზიანება დაადასტურა
უკრაინის შეიარაღებული ძალების გენერალურმა შტაბმა დაადასტურა, რომ 20 სექტემბრის ღამეს უკრაინის თავდაცვის ძალების დანაყოფებმა კაპოტნიაში მდებარე „გაზპრომნეფტ-მოსკოვის ნავთობგადამამუშავებელ ქარხანას“ დაარტყეს.
გენშტაბის ინფორმაციით, ობიექტის ტერიტორიაზე დაზიანდა ნავთობის პირველადი გადამუშავების AVT-6 დანადგარი, ნავთობის კომპლექსური გადამუშავების დანადგარი და იზომერიზაციის დანადგარი. ამ ნავთობგადამამუშავებელ ქარხანას ივნისშიც დაესხნენ თავს.
„ქარხანა ჩართულია რუსეთის შეიარაღებული ძალების საჭიროებების უზრუნველყოფაში. რუსი აგრესორის მსგავსი ობიექტების დაზიანება უკრაინის მიერ გაეროს წესდების 51-ე მუხლით გათვალისწინებული თავდაცვის განუყოფელი უფლების განხორციელებაა და მიმართულია რუსეთის ფედერაციის სამხედრო-ეკონომიკური პოტენციალის შემცირებისკენ“, — დაწერა გენშტაბმა სოციალურ ქსელებში.
მოსკოვისა და ოლქის ხელისუფლება რეგიონზე უკრაინული შეტევების შედეგად დაღუპულების შესახებ იუწყებოდა
მოსკოვის ოლქში უპილოტო საფრენი აპარატების მასშტაბური შეტევის შედეგად ორი ადამიანი დაიღუპა და სულ მცირე 20 დაშავდა. რეგიონის თავზე 249 უკრაინული დრონი ჩამოაგდეს, — წერდა 20 სექტემბრის დილით რეგიონის გუბერნატორი ანდრეი ვორობიოვი Telegram-ზე.
მისი თქმით, დრონები მოხვდა სამ მრავალსართულიან საცხოვრებელ სახლსა და ერთ კერძო სახლს, სადაც ხანძრები გაჩნდა. გამოცემა Astra-ს ინფორმაციით, სრულად იწვოდა დაახლოებით 850 ათასი კვადრატული მეტრის ფართობის ლოგისტიკური კომპლექსი „Современные складские технологии“.
მოსკოვის მერმა სერგეი სობიანინმა განაცხადა, რომ მოსკოვისკენ მიმავალ გზაზე 450 დამრტყმელი დრონი ჩამოაგდეს.
„მოსკოვზე მტრის უპილოტო საფრენი აპარატების ყველაზე მასშტაბური შეტევა მოვიგერიეთ. გუშინდელი დღიდან ყველა მიმართულებით 1600-ზე მეტი დრონის შეტევა იქნა მოგერიებული. მათგან 450 — მოსკოვისკენ მიმავალ გზაზე. რამდენიმე უპილოტო აპარატმა მოსკოვის ნავთობგადამამუშავებელი ქარხნის ტერიტორიას მიაღწია, ერთი საცხოვრებელ სახლს მოხვდა. დაღუპულები არ არიან“, — დაწერა სობიანინმა.
Telegram-არხი „Осторожно, новости“ ადგილობრივ მოსახლეობაზე დაყრდნობით კოტელნიკებში საცხოვრებელ კომპლექსში ხანძრის შესახებ იუწყებოდა. ისტრაში დრონის ნამსხვრევებმა საცხოვრებელ სახლში ბინა დააზიანა, — განაცხადა მუნიციპალური ოლქის ხელმძღვანელმა ტატიანა ვიტუშევამ. მუშაობა დროებით შეაჩერეს მოსკოვის ვნუკოვოს, დომოდედოვოსა და ჟუკოვსკის აეროპორტებმა.