გერმანიის ფედერალური მთავრობა და ფედერალური მიწები შეთანხმდნენ, რომ ბიზნესისა და მოსახლეობის ფინანსური ტვირთის შესამსუბუქებლად ბენზინსა და დიზელზე „საწვავის შეღავათს“ და ფასის ზედა ზღვარს შემოიღებენ.
ხელისუფლების გეგმის თანახმად, 1 ოქტომბრიდან 2026 წლის ბოლომდე მთავრობა ბენზინსა და დიზელზე ენერგეტიკულ გადასახადს 14 ცენტით შეამცირებს. სააგენტო dpa-ს ცნობით, დღგ-ის გათვალისწინებით, ფასი მთლიანობაში ლიტრზე 17 ცენტით დაიკლებს. გერმანიაში მსგავსი „საწვავის შეღავათი“ უკვე მოქმედებდა მაისის დასაწყისიდან ივნისის ბოლომდე.
მოსალოდნელია, რომ ეს ზომა გერმანიის მოსახლეობისა და საწარმოების ფინანსურ ტვირთს დაახლოებით 2,5 მილიარდი ევროთი შეამცირებს. მთავრობა „საწვავის შეღავათს“ ნაწილობრივ ფედერალური მიწების 1,25 მილიარდი ევროს მოცულობის შენატანით დააფინანსებს.
გერმანიის კანცლერმა ფრიდრიხ მერცმა განაცხადა, რომ „დაძაბული ბიუჯეტების“ პირობებში საუბარია „საკმაოდ სოლიდურ თანხაზე“. თუმცა მან ასევე აღიარა, რომ გერმანიის მოქალაქეები, „რომლებიც ყოველდღიურად ავტომობილზე არიან დამოკიდებული, თავიანთი შესაძლებლობების ზღვარს აღწევენ“ ავტოგასამართ სადგურებზე მაღალი ფასების გამო.
საწვავზე ფასის ზედა ზღვარი 2027 წლის დასაწყისამდე შემოვა
ფედერალურ მთავრობაში ასევე შეთანხმდნენ, რომ ბელგიისა და ლუქსემბურგის მაგალითზე, 2027 წლის 1 იანვრამდე საწვავზე ფასის ზედა ზღვარი დაწესდება. როგორც dpa წერს, ამ ზომამ ბენზინსა და დიზელზე მაქსიმალური ფასი უნდა განსაზღვროს. ის გამოითვლება ნავთობის ფასების დინამიკის, ტრანსპორტირებისა და რეალიზაციის ხარჯებისა და სავაჭრო მარჟის გათვალისწინებით.
მანამდე მმართველ კოალიციაში კონსერვატიული CDU/CSU-ს პარტნიორი სოციალ-დემოკრატიული პარტია არაერთხელ გამოდიოდა ფასის ასეთი ზედა ზღვრის დაწესების ინიციატივით. თუმცა ფედერალური ეკონომიკის მინისტრი კატერინა რაიხე ამ ზომის წინააღმდეგი იყო.
მთავრობა მოსახლეობის მხარდაჭერას გააგრძელებს
სააგენტო AFP-ის ცნობით, გერმანიის მთავრობა აპირებს გააგრძელოს ქვეყნის მოსახლეობისა და იმ საწარმოების მხარდაჭერა, რომლებიც ახლო აღმოსავლეთში მიმდინარე კრიზისის გამო საწვავის მაღალი ფასებით დაზარალდნენ. კერძოდ, ხელისუფლება განიხილავს მექანიზმის შექმნის შესაძლებლობას, რომელიც მოსახლეობისთვის პირდაპირი გადახდების გაცემას შემოსავლის დონის გათვალისწინებით ითვალისწინებს.
გარდა ამისა, გერმანიის ხელისუფლება მხარს უჭერს ნავთობის სექტორთან მიმართებით ევროკავშირის დონეზე ზომების მიღებას, 2022 წლის ენერგეტიკული კრიზისის ანალოგიურად. საუბარია, მათ შორის, ზემოგებაზე გადასახადის დაწესებაზე, რომლის ევროკავშირის დონეზე აღდგენასაც აქტიურად უჭერს მხარს გერმანიის ფინანსთა მინისტრი ლარს კლინგბაილი.