რუსეთისა და საქართველოს ხალხებს „ერთმანეთი მოენატრათ“, ხოლო სავიზო შეზღუდვების მოხსნა დიდი ხნის ნანატრი იყო. ამის შესახებ TASS-თან ინტერვიუში რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ ახალგაზრდობის საერთაშორისო ფესტივალის დასრულების შემდეგ განაცხადა.
„ვფიქრობ, საქართველოს დელეგაციას ამ მოედანზე [ახალგაზრდობის საერთაშორისო ფესტივალზე] პირველად არ ხედავთ. დიახ, ჩვენ ოფიციალური დიპლომატიური ურთიერთობები არ გვაქვს, თუმცა ამავდროულად აქტიურად ვითარდება ვაჭრობა, ეკონომიკური და ჰუმანიტარული სფეროები. ბოლოს და ბოლოს — და ამ შემთხვევაში სიტყვა „ალილუიას“ გამოვიყენებ, რადგან ამას იმდენად დიდხანს ველოდით — სავიზო შეზღუდვები მოიხსნა. და ის, რისი შესაძლებლობაც, ფაქტობრივად, საქართველოდან ჩამოსულ მხოლოდ ცალკეულ ჯგუფებსა და დელეგაციებს ჰქონდათ, რომლებიც ამ ფორუმში მონაწილეობდნენ, ახლა ამ ქვეყნის თითოეულ მცხოვრებს, თითოეულ მოქალაქეს შეუძლია“, — განაცხადა მან, როდესაც უპასუხა კითხვას, თუ რა მნიშვნელობა აქვს ფორუმზე ქვეყნების ფართო წარმომადგენლობას.
„ყველას ველოდებით. ჩვენ ნამდვილად მოგვენატრეთ. ეს არის ყველაზე ზუსტი სიტყვა: ჩვენ ერთმანეთი მოგვენატრა“, — დასძინა ზახაროვამ.
ზახაროვას თქმით, საქართველოს მიმართულება, რომელიც რუსი ტურისტებისთვის ღიაა, ვითარდება.
„როგორ ხვდებიან იქ ჩვენს მოქალაქეებს, როგორი კარგი მომსახურებაა. იმავეს თქმა შემიძლია რუსეთზეც. ჩვენ ველოდებით როგორც ტურისტულ ნაკადებს, ისე ადამიანებს ნებისმიერი სხვა — ჰუმანიტარული, ეკონომიკური თუ ბიზნესმიზნებით, მათ შორის საერთაშორისო ღონისძიებებში მონაწილეობის მისაღებად“, — განმარტა მან.
ზახაროვას თქმით, ის საქართველოს დელეგაციის წარმომადგენლებსაც ესაუბრა, კითხვები კი ჟურნალისტებმაც დაუსვეს, „სწორედ საქართველოს წარმომადგენლებმა“.
„ჩვენ არასოდეს აგვიგია ბარიერები და არ შეგვიქმნია დაბრკოლებები მათთვის, ვინც ჩვენთან მშვიდობით მოდიოდა. იქნებოდნენ ისინი არამეგობრული რეჟიმების მქონე ქვეყნების წარმომადგენლები თუ ჩვენი მოკავშირე სახელმწიფოების წარმომადგენლები — არანაირი სეგრეგაცია არასდროს ყოფილა“, — განაცხადა ზახაროვამ.