CNN-ს, MS NOW-სა და Politico-ს თეთრ სახლში შესვლა აუკრძალეს

მედიასაშუალებებმა CNN-მა, MS NOW-მ და Politico-მ შაბათს განაცხადეს, რომ სამართლებრივ ზომებს მიმართავენ მას შემდეგ, რაც იმავე დღეს მათი ჟურნალისტები თეთრი სახლის ტერიტორიაზე არ შეუშვეს.

ეს მოხდა ერთი დღის შემდეგ, რაც აშშ-ის პრეზიდენტმა დონალდ ტრამპმა განაცხადა, რომ თავისი პრეზიდენტობის გაშუქებასთან დაკავშირებული უთანხმოების გამო ამ სამ მედიასაშუალებას 1600 Pennsylvania Avenue-ზე შესვლას აუკრძალავდა.

ტრამპი მედიას მისი მეორე საპრეზიდენტო ვადის ხშირად კრიტიკული გაშუქების გამო „ყალბი ამბების“ გავრცელებაში ადანაშაულებს.

ექსპერტების თქმით, ეს აკრძალვები წინააღმდეგობაში მოდის აშშ-ის კონსტიტუციის პირველი შესწორებით დაცულ სიტყვის თავისუფლებასა და პრესის თავისუფლებასთან.

რას აცხადებენ CNN, MS NOW და Politico?

CNN-ის ცნობით, მის ჟურნალისტ ბეტსი კლაინს შაბათ დილით თეთრ სახლში შესვლის უფლება არ მისცეს და პრესის აკრედიტაცია ჩამოართვეს.

„CNN-ის მისია — გააშუქოს აშშ-ის მთავრობის საქმიანობა — გაგრძელდება მიუხედავად ნებისმიერი მცდელობისა, შეიზღუდოს თეთრ სახლსა და სხვა სამთავრობო შენობებში ფიზიკური წვდომა ან სხვაგვარად შეეშალოს ხელი ჩვენს ჟურნალისტურ საქმიანობას“, — ნათქვამია ტელეარხის განცხადებაში.

„აშშ-ის კონსტიტუციის თანახმად, ჩვენ გვაქვს უფლება, ჩვენი ჟურნალისტური საქმიანობა მთავრობის მხრიდან დაბრკოლებისა და ჩარევის გარეშე განვახორციელოთ, და ეს აკრძალვა ამ ფუნდამენტურ უფლებაზე უკანონო თავდასხმაა.“

ამავდროულად, მემარცხენე მიმართულების MS NOW-მა, რომლის ჟურნალისტებიც შაბათს თეთრი სახლის ტერიტორიაზე არ შეუშვეს, განაცხადა, რომ ტრამპის აკრძალვას გაასაჩივრებს.

„თეთრი სახლი ამერიკელ ხალხს ეკუთვნის და იქ მიღებული გადაწყვეტილებები ჩვენი გადასახადებით ფინანსდება“, — ნათქვამია ტელეკომპანიის განცხადებაში. „MS NOW აპირებს გადადგას ყველა აუცილებელი ნაბიჯი ჩვენი პირველი შესწორებით გარანტირებული უფლებებისა და ჩვენს დემოკრატიაში დამოუკიდებელი ჟურნალისტიკის უმნიშვნელოვანესი როლის დასაცავად.“

Politico-ს გლობალურმა მთავარმა რედაქტორმა ჯონათან გრინბერგერმა კი თანამშრომლებს ელექტრონული ფოსტით მისწერა:

„რამდენიმე წუთის წინ ჩვენი კოლეგა შეიენ ჰასლეტი შეეცადა თეთრ სახლში შესვლას, რათა POLITICO-ს რეპორტიორის მოვალეობა შეესრულებინა.

საიდუმლო სამსახურმა მას კომპლექსში შესვლის უფლება არ მისცა და ჩამოართვა საშვი, რომელიც თეთრ სახლში წვდომის უფლებას აძლევდა.

ჩვენ მხარს ვუჭერთ მას და ყველა ჟურნალისტს, ვინც აქ თეთრ სახლს აშუქებს. როგორც გუშინ ვთქვით, ენერგიულად დავიცავთ პირველი შესწორებით გარანტირებულ ჩვენს უფლებებს“, — დაწერა გრინბერგერმა.

რაში დაადანაშაულა ტრამპმა ამერიკული მედიასაშუალებები?

Truth Social-ზე გამოქვეყნებულ პოსტში ტრამპმა განაცხადა, რომ ამ მედიასაშუალებებს „არ უნდა შეეძლოთ მუდმივად წერა ან გაშუქება გამოგონილი ამბებისა და ტყუილების შესახებ, როდესაც ისინი ამერიკის შეერთებული შტატების პრეზიდენტს აშუქებენ“.

„შემდეგ სხვებიც იქნებიან ყალბი ამბების გამავრცელებელი მედიიდან“, — გააფრთხილა მან.

ტრამპის თქმით, აკრძალვის მიზეზი რომელიმე ერთი კონკრეტული შემთხვევა არ ყოფილა. ოვალურ კაბინეტში ჟურნალისტებს მან უთხრა: „ეს, ფაქტობრივად, ბოლო რამდენიმე წლის განმავლობაში დაგროვილი ისტორიების შედეგია.“

„მე არ ვარ ვალდებული ისინი ჩემს… ხალხის სახლში შევუშვა“, — დასძინა მან.

უცნობია, გავრცელდება თუ არა აკრძალვა ამ მედიასაშუალებების ჟურნალისტების პრეზიდენტის თვითმფრინავით, Air Force One-ით მგზავრობაზეც.

აშშ-ში 3 ნოემბრის შუალედურ არჩევნებამდე სულ რამდენიმე კვირაა დარჩენილი. ამ არჩევნებზე ტრამპის რესპუბლიკურ პარტიას კონგრესში არსებული მცირე უმრავლესობის შენარჩუნება მოუწევს.

ტრამპის მოწონების რეიტინგი 35%-ია და ისტორიულ მინიმუმებთან ახლოსაა, ხოლო Reuters/Ipsos-ის გამოკითხვების მიხედვით, დემოკრატები დაახლოებით 7–9 პროცენტული პუნქტით წინ არიან.

ტრამპის დაპირისპირება პრესასთან

მეორე საპრეზიდენტო ვადის განმავლობაში ტრამპი კვლავ მწვავედ უპირისპირდება იმ ჟურნალისტებს, რომლებიც, მისი შეფასებით, მის ადმინისტრაციას კრიტიკულად აშუქებენ — ეს მიდგომა მან პირველად პრეზიდენტად არჩევის შემდეგაც გამოიყენა.

გასულ წელს მან Associated Press-ის სააგენტო პრეზიდენტის საქმიანობის გამშუქებელი ჟურნალისტების ჩვეულებრივ პრეს-პულში აღარ დაუშვა მას შემდეგ, რაც სააგენტომ უარი თქვა მექსიკის ყურისთვის „ამერიკის ყურის“ დარქმევაზე.

ამავდროულად, ტრამპმა უფრო ახლო წვდომა მისცა ახალ, ულტრამემარჯვენე მედიასაშუალებებს, რომლებიც მის პოლიტიკას უფრო კეთილგანწყობილად აშუქებენ.

ტრამპმა აშშ-ის მედიის მარეგულირებელს რამდენიმე ტელემაუწყებლის ლიცენზიის გაუქმებისკენაც კი მოუწოდა, რადგან მათი იუმორისტული თუ საინფორმაციო პროგრამები მის პოლიტიკასა და ოჯახს დასცინოდნენ.

პრეზიდენტმა ასევე შეიტანა რამდენიმე სარჩელი Wall Street Journal-ის, New York Times-ის, BBC-ისა და აიოვის გაზეთ Des Moines Register-ის წინააღმდეგ. ზოგიერთ შემთხვევაში ამ დავების მოგვარება მედიასაშუალებებს მილიონობით დოლარი დაუჯდათ.