პენიტენციური სამსახური აცხადებს, რონ №6 პენიტენციურ დაწესებულებაში მყოფ მსჯავრდებულ გიორგი დავითაძეზე ფიზიკური და ფსიქოლოგიური ძალადობის ფაქტს ადგილი არ ჰქონია.
უწყების განმარტებით, პატიმარი შინაგანაწესსა და სარეჟიმო მოთხოვნებს სისტემატურად არღვევს, ქმნის კონფლიქტურ სიტუაციებს, თანამშრომლებს სიტყვიერ შეურაცხყოფას აყენებს და ამის გამო არაერთხელ დაისაჯა დისციპლინურად.
ოჯახის მიერ ძალადობის პერიოდად დასახელებულ 2025 წლის 21 დეკემბერს დავითაძე სწორედ სარეჟიმო წესების დარღვევის გამო მოათავსეს დეესკალაციის საკანში, თუმცა პენიტენციური სამსახური ამ ბრალდებას სრულ სიცრუეს უწოდებს.
როგორც ოფიციალურ განცხადებაშია აღნიშნული, გიორგი დავითაძის დეესკალაციის საკანში ყოფნის ვიდეომასალა პროკურატურასა და სახალხო დამცველის ოფისს 2025 წლის 29 დეკემბრის მოთხოვნის საფუძველზე გადაეცა, რის შემდეგაც დათვალიერებულმა კადრებმა ძალადობის ფაქტი არ დაადასტურა.
ვინაიდან მსჯავრდებული პროვოკაციული ქმედებებით გამოირჩევა, გენერალური დირექტორის გადაწყვეტილებით, 2026 წლის 3 მარტიდან მის შესახებ არსებული ვიდეომასალის უწყვეტი დაარქივება მიმდინარეობს. მაღალი საზოგადოებრივი ინტერესის გათვალისწინებით, უწყება მზაობას გამოთქვამს, კანონმდებლობით დადგენილი წესით გაასაჯაროოს როგორც გამოძიებისთვის მიწოდებული, ისე მარტიდან დაარქივებული ყველა ვიდეოჩანაწერი.