„ქართული ოცნება“ მის მიერ 2025 წელს შექმნილ გრანტების მართვის სააგენტოს ხურავს. როგორც ირაკლი კობახიძემ ჟურნალისტებს განუცხადა, „ენჯეო” ხელოვნურად მოგონილი ფენომენია, რომლის ერთადერთი მიზანიც არის ერთი სახელმწიფოს ინტერვენცია მეორე სახელმწიფოში.
„ენჯეო” არის ხელოვნური ფენომენი, რომელიც არის მოგონილი ხელოვნურად, უცხოური პოლიტიკური ინტერვენციისთვის. როდესაც ჩვენ შესაბამისი სააგენტო შევქმენით, გამოჩნდა, რომ ეს ასეა. “ენჯეოს” ერთადერთი მიზანი შეიძლება იყოს ერთი სახელმწიფოს ინტერვენცია მეორე სახელმწიფოში. ამისთვის მოიგონეს “ენჯეოები” თავის დროზე. ერთი საუკუნის წინ “ენჯეოები” არ არსებობდნენ. შემდეგ მოიგონეს და “ენჯეოებს” იყენებდნენ, როგორც უცხოური ინტერვენციის მთავარ ინსტრუმენტს. ამის არაერთი მაგალითი ვნახეთ საქართველოში. შესაბამისად, ჩვენ მოვიგონოთ “ენჯეოები” და ასეთი რამ დავაფინანსოთ, ასეთი რამ არასწორია, შესაბამისად, ამის გამო მივიღეთ ასეთი გადაწყვეტილება“, – განაცხადა კობახიძემ.
სსიპ სახელმწიფო გრანტის მართვის სააგენტო 2025 წლის 15 აპრილს შეიქმნა. მანამდე „ოცნებამ“ “„უცხოური დაფინანსების გამჭვირვალობის შესახებ“ კანონი და „გრანტების შესახებ“ კანონში ცვლილებები მიიღო, რითაც უცხოური გრანტების მიღება სრულად შეზღუდა. გრანტების მართვის სააგენტო კი ერთგვარ „ალტერნატივად“ შექმნა და საგრანტო თანხები სახელმწიფო ბიუჯეტიდან გამოყო.
სახელმწიფოს მიერ გრანტების გამცემი ორგანო, – სწორედ არასამთავრობო ორგანიზაციების შემზღუდველი კანონის მიღების შემდეგ, 2017 წელს რუსეთშიც შეიქმნა. ამიტომაც ოპონენტები „ოცნების“ ინიციატივას გრანტების მართვის სააგენტოს შექმნის თაობაზე, იმთავითვე რუსულ ანალოგს უწოდებდნენ და აცხადებდნენ, რომ მისი მიზანი კონტროლქვეშ მყოფი ისეთი არასამთავრობო ორგანიზაციების არსებობაა, რომლებიც მმართველი პარტიის ინტერესების გამტარებლები იქნებოდნენ.