რუმინეთში 1,1 მილიონი ევროს თაღლითობის საქმეზე დააკავეს ქვეყნის პრეზიდენტობის ყოფილი კანდიდატი კალინ ჯორჯესკუ — პოლიტიკოსი, რომელმაც 2024 წლის არჩევნების პირველი ტური მოიგო. მაშინ რუმინეთის საკონსტიტუციო სასამართლომ შედეგები რუსეთის შესაძლო ჩარევასთან დაკავშირებული ეჭვების გამო გააუქმა. რუმინული მედიის ცნობით, რუსეთის კვალს თაღლითობის საქმეშიც ხედავენ.
ჯორჯესკუ ორშაბათს, 21 სექტემბერს, დილით დააკავეს, როდესაც საკუთარი ავტომობილით საცურაო აუზისკენ მიდიოდა, იუწყება Antena3 CNN. პოლიციელებმა ის საკუთარ სახლში წაიყვანეს, რათა იქ ჩხრეკა ჩაეტარებინათ. ჯორჯესკუს საქმესთან დაკავშირებით ჩხრეკა სულ მის კუთვნილ ხუთ სახლში მიმდინარეობს.
ორგანიზებულ დანაშაულსა და ტერორიზმთან ბრძოლის სამმართველოს (DIICOT) პრესრელიზის თანახმად, 2021 წელს რუმინეთის ორმა მოქალაქემ და ერთმა იტალიელმა დანაშაულებრივი ჯგუფი შექმნეს. ისინი რუმინელ ბიზნესმენებს მილიონობით ევროს ოდენობის სესხების მიღებას სთავაზობდნენ, თუმცა ამის პირობად ფულად დეპოზიტს ითხოვდნენ. დაზარალებულმა თაღლითებს თავდაპირველად 1 მილიონი ევრო გადაურიცხა, იმ იმედით, რომ 6-მილიონიან სესხს მიიღებდა, მოგვიანებით კი კიდევ 100 ათასი ევრო — მას შემდეგ, რაც სესხის თანხის 15 მილიონ ევრომდე გაზრდა შესთავაზეს.
DIICOT ეჭვმიტანილებისა და დაზარალებულის სახელებს არ ასახელებს და მხოლოდ აღნიშნავს, რომ ჯგუფის ხელმძღვანელი 64 წლის რუმინელი იყო. ადგილობრივი მედიის ცნობით, ჯორჯესკუს გარდა, საქმეში ფიგურირებენ 47 წლის რუმინელი ბიზნესმენი იონელ რუსენი და 56 წლის იტალიელი მასიმილიანო არენა. დაზარალებული კი რუმინელი ბიზნესმენი რაზვან ლეუა.
როგორც G4Media და Euronews Romania წერენ, ჩხრეკისას პოლიციამ სიგნალის ჩამხშობი მოწყობილობა და მალტის ორდენის ყალბი პირადობის მოწმობა იპოვა, რომელიც „სენატორ“ კალინ ჯორჯესკუს სახელზე იყო გაცემული. რუმინეთში მალტის ორდენის ელჩმა რობერტო მუსნეჩიმ G4Media-ს განუცხადა, რომ ჯორჯესკუ ორდენის წევრი არ არის.
G4Media-სა და Digi24-ის წყაროების ინფორმაციით, საქმეში ფიგურირებს Migom Bank — დომინიკაში რეგისტრირებული ბანკი, რომელიც ფორმალურად შვეიცარიის მოქალაქე თომას სკეტის ეკუთვნოდა, თუმცა მას რუსეთის მოქალაქეები აკონტროლებდნენ. სწორედ ამ ბანკში გადარიცხა ლეუმ 1,1 მილიონი ევრო. კერძოდ, როგორც Digi24 წერს, სკეტი დაკავშირებული იყო რუს ბიზნესმენ ანდრეი კოჩეტკოვთან.
ლეუმ განცხადება გაავრცელა, რომელშიც დაადასტურა, რომ 2024 წლის იანვარში სისხლის სამართლის საჩივარი შეიტანა და სწორედ ის დაედო საფუძვლად DIICOT-ის გამოძიებას.
„ეს ერთი მიზეზის გამო გავაკეთე: მილიონ ევროზე მეტი დავკარგე, რომელიც მძიმე შრომით მქონდა გამომუშავებული, დაფინანსების დაპირებების გამო, რომლებიც არასოდეს განხორციელებულა. რამდენიმე წლის განმავლობაში ვცდილობდი ფულის მშვიდობიანი გზით დაბრუნებას, მაგრამ უშედეგოდ“, — განაცხადა მან.
ბიზნესმენმა ხაზი გაუსვა, რომ მას პოლიტიკური მოტივები არ ჰქონია.
„როგორც მე, მილიონობით რუმინელიც — როგორც თავად ნახეთ — ენდობოდა კალინ ჯორჯესკუს. მე სრულად ვენდობოდი კალინ ჯორჯესკუს და მის ნათქვამს. სამწუხაროდ, საბოლოოდ აღმოჩნდა, რომ ეს ყველაფერი თაღლითური სქემა და მოტყუება იყო“, — დასძინა ლეუმ.
ბუქარესტში, DIICOT-ის შენობასთან, სადაც ჩხრეკის შემდეგ ჯორჯესკუ დაკითხვაზე გადაიყვანეს, პრეზიდენტობის ყოფილი კანდიდატის რამდენიმე ასეული მხარდამჭერი შეიკრიბა.
თაღლითობის საქმე ჯორჯესკუს წინააღმდეგ აღძრული პირველი სისხლის სამართლის საქმე არ არის. მას უკვე წაუყენეს ბრალდება 2024 წელს სახელმწიფო გადატრიალების ორგანიზების მცდელობის საქმეზე.
კალინ ჯორჯესკუმ 2024 წლის ნოემბერში საპრეზიდენტო არჩევნების პირველი ტური მოულოდნელად მოიგო. თუმცა რუმინეთის საკონსტიტუციო სასამართლომ კენჭისყრის შედეგები „რუსეთის ჩარევის“ გამო გააუქმა და ჯორჯესკუს განმეორებით არჩევნებში მონაწილეობის უფლება არ მისცა. ხელახალ არჩევნებში, 2025 წლის მაისში, ნიკუშორ დანმა გაიმარჯვა.