ბიზნესმენ თემურ უგულავას გარდაცვალების შემდეგ მისი სამკვიდროს მიღების შესახებ განცხადებები შვიდმა მემკვიდრემ წარადგინა – ამის შესახებ თემურ უგულავას საკუთრებაში არსებული ერთ-ერთი კომპანიის განახლებული ამონაწერი მოწმობს, საიდანაც ირკვევა, რომ წილის მმართველებად 17 სექტემბერს მისი შვილები დარეგისტრირდნენ; თუმცა როგორც bm.ge წერს, უგულავას “აჭარა ჯგუფის” ძირითადი ჰოლდინგური კომპანიის ამონაწერში, ჯერჯერობით, მსგავსი ცვლილებები არ ასახულა.
სამკვიდროს მიღების შესახებ განცხადებები წარადგინეს გეგა, ნუცა, სანდრო, ნოდარ, თეიმურაზ, ტოკიო მარგო და ლუკა უგულავებმა. დოკუმენტის თანახმად, ისინი თემურ უგულავას შვილები და კანონით პირველი რიგის მემკვიდრეები არიან. სამი არასრულწლოვანი მემკვიდრის შემთხვევაში განცხადებები მათმა კანონიერმა წარმომადგენლებმა წარადგინეს, ხოლო ერთ შემთხვევაში განცხადება მემკვიდრის მხარდამჭერის მიერ იქნა წარმოდგენილი. სამკვიდრო მოწმობა, სამოქალაქო კოდექსის შესაბამისად, მემკვიდრეთა მოთხოვნის შემთხვევაში სამკვიდროს გახსნიდან ექვსი თვის გასვლის შემდეგ გაიცემა.
დოკუმენტში ცალკე არის მითითებული თემურ უგულავას სამეწარმეო საქმიანობიდან გამომდინარე უფლებამოსილებებიც, თუმცა ის არ მოიცავს სამკვიდროს გასხვისების უფლებას, გარდა კანონით ან შესაბამისი დოკუმენტით გათვალისწინებული შემთხვევებისა.
მოწმობის თანახმად, სამკვიდროს მართვის შედეგად მიღებული ყველა შემოსავალი და სარგებელი თავად სამკვიდროს მიეკუთვნება. დოკუმენტში ასევე განსაზღვრულია მემკვიდრეთა ვალდებულებები სამკვიდროს კეთილსინდისიერად მართვისა და მართვის შესახებ ანგარიშგების მიმართულებით.
შეგახსენებთ, რამდენიმე დღის წინ „აჭარა ჯგუფის აქტივების მართვის კომპანიამ” თბილისში მუხიანის დასახლებაში მდებარე “რადიო ქალაქის” 24,000 კვადრატული მეტრის უძრავი ქონება ბერა ივანიშვილის კომპანიას მიჰყიდა. ბიზნეს რეესტრზე გამოქვეყნებულ დოკუმენტაციაში ნასყიდობის ფასი მითითებული არ არის.