პრეზიდენტმა ვოლოდიმირ ზელენსკიმ დონალდ ტრამპთან შეხვედრის შემდეგ გამართულ პრესკონფერენციაზე განაცხადა, რომ მზად არის ვლადიმირ პუტინს შეხვდეს, ხოლო შეერთებულ შტატებს ასეთი შეხვედრის ორგანიზებაში დახმარება შეუძლია.
„ყველაზე მნიშვნელოვანი, რისი გაკეთებაც პრეზიდენტს [აშშ-ის პრეზიდენტ დონალდ ტრამპს] შეუძლია, მათ შორის იმ საკითხებთან დაკავშირებით, რომლებიც დღეს ადრე წამოვაყენე, არის სამმხრივი შეხვედრის ორგანიზება, სადაც ქვეყნების ლიდერები ყველა მწვავე საკითხის განხილვას შეძლებენ“, — ციტირებს ზელენსკის „უკრაინსკა პრავდა“.
კითხვაზე, ნიშნავს თუ არა ეს პუტინთან შეხვედრისთვის მზადყოფნას, ზელენსკიმ უპასუხა:
„დიახ, მე მზად ვარ, პუტინს ნებისმიერ დროს შევხვდე. ვფიქრობ, ყველამ რაც შეიძლება სწრაფად უნდა ვიმოძრაოთ [ომის დასრულების მიმართულებით].“
„თუ ამბობთ, რომ ომი დიალოგის გზით უნდა დასრულდეს, ეს ნიშნავს, რომ უნდა შეხვდე და ილაპარაკო“, — დასძინა ზელენსკიმ.
უკრაინის პრეზიდენტმა ვოლოდიმირ ზელენსკიმ ნიუ-იორკში, გაეროს გენერალური ასამბლეის ფარგლებში აშშ-ის პრეზიდენტ დონალდ ტრამპთან შეხვედრის შესახებ Telegram-ზე გამოქვეყნებულ მოკლე ანგარიშში განაცხადა, რომ „გუნდები მუშაობას აგრძელებენ“ უკრაინაში Patriot-ის საჰაერო თავდაცვის სისტემებისთვის განკუთვნილი საზენიტო რაკეტების წარმოების დასაწყებად.
„მადლობელი ვარ იმისთვის, რომ […] ჩვენი გუნდები აგრძელებენ მუშაობას უკრაინაში Patriot-ისთვის განკუთვნილი დამჭერი რაკეტების წარმოების დაწყებაზე. სწორედ ეს დაგვეხმარება ადამიანების სიცოცხლის დაცვაში, თუ რუსეთი მოლაპარაკებებს უარყოფს და ამ ზამთარსა და შემდგომშიც ჩვენი ხალხის წინააღმდეგ ბალისტიკური რაკეტებით ტერორზე გააგრძელებს ფსონის დადებას“, — ნათქვამია ზელენსკის Telegram-არხზე გამოქვეყნებულ ჩანაწერში.
უკრაინის პრეზიდენტის თქმით, ტრამპსა და ამერიკულ დელეგაციასთან შეხვედრაზე ასევე განიხილეს უკრაინისთვის „ზამთრის საჰაერო თავდაცვის პაკეტის“ გადაცემა, რომელშიც, სავარაუდოდ, Patriot-ის რაკეტებიც შევა, ასევე „შესაძლო დეესკალაციის ნაბიჯები, რომლებმაც დიპლომატიისკენ გზა შეიძლება გახსნას“.
შეხვედრამდე გამართულ მოკლე ბრიფინგზე დონალდ ტრამპს ჰკითხეს, მზად იყო თუ არა რაკეტების წარმოებისთვის საჭირო ლიცენზიების გადაცემის დასაშვებად. მან კვლავ არ გასცა კონკრეტული პასუხი და მხოლოდ აღნიშნა, რომ ეს საკითხი შეხვედრაზე განიხილებოდა.