რუსეთის საგარეო საქმეთა სამინისტრო 2008 წლის აგვისტოს ომთან დაკავშირებით განცხადებას ავრცელებს. რუსეთიც ომის დაწყების თარიღად ქართული ოცნების მსგავსად,8 აგვისტოს მიიჩნევს. განცხადებაში აგვისტოს ომის დაწყებაში მიხეილ სააკაშვილის ხელისუფლებაა დადანაშაულებული და გამოთქმულია კმაყოფილება იმის გამო, რომ საქართველოში 2008 წლის აგვისტოს მოვლენების გადახედვის მცდელობა შეინიშნება. კრემლის საგარეო უწყება იმედს გამოთქვამს, რომ საქართველოს ხელმძღვანელობის განცხადებები აფხაზებთან და სამხრეთ ოსებთან შერიგების აუცილებლობასთან დაკავშირებით მხოლოდ განცხადებებად არ დარჩება:
„დღეს, სამხრეთ კავკასიაში მომხდარი ტრაგიკული მოვლენებიდან 18 წელი შესრულდა. 2008 წლის 7-8 აგვისტოს ღამეს, სააკაშვილის რეჟიმმა საქართველო-სამხრეთ ოსეთის კონფლიქტის მშვიდობიანი მოგვარების შესახებ ყველა საერთაშორისო შეთანხმების დარღვევით, სამხრეთ ოსეთის წინააღმდეგ ვერაგული აგრესია განახორციელა, რასაც მშვიდობიან მოსახლეობასა და რუს მშვიდობისმყოფელებს შორის მრავალრიცხოვანი მსხვერპლი მოჰყვა. ქართული თავდასხმის არაპროვოცირებული ხასიათი მოგვიანებით ოფიციალურად დადასტურდა, კერძოდ, ევროკავშირის ეგიდით შექმნილი შვეიცარიელი დიპლომატის ტალიავინის ხელმძღვანელობით საქართველოში კონფლიქტის ფაქტების დამდგენი დამოუკიდებელი საერთაშორისო მისიის ანგარიშში.
მოსკოვი აღნიშნავს ქართულ საზოგადოებაში 2008 წლის აგვისტოს მოვლენების გადახედვის მცდელობებს. ამასთან, შეიარაღებული კონფლიქტის გაჩაღებაზე სააკაშვილის რეჟიმის სრული პასუხისმგებლობის აღიარება გამართლებულია. ფიქსირდება საქართველოს ხელმძღვანელობის განცხადებები აფხაზებთან და სამხრეთ ოსებთან შერიგების აუცილებლობასთან დაკავშირებით, რაც იმის იმედს იძლევა, რომ მიდგომის აღნიშნული ტრანსფორმაცია მხოლოდ განცხადებების დონეზე არ დარჩება და აფხაზეთთან და სამხრეთ ოსეთთან ურთიერთობების მოგვარების მიზნით კონკრეტული პრაქტიკული ქმედებებით გამყარდება“, – აცხადებს რუსეთის საგარეო უწყება.