რუსეთის უშიშროების საბჭოს თავმჯდომარის მოადგილემ, დიმიტრი მედვედევმა, რომელიც 2008 წლის რუსული აგრესიის დროს რუსეთის პრეზიდენტი იყო, რუსულ მედიასთან ინტერვიუში აგვისტოს ომზე ილაპარაკა და თქვა, რომ დასავლეთმა საქართველო რუსეთის წინააღმდეგ იარაღად გამოიყენა. ინტერვიუ მედვედევმაც აგვისტოს ომიდან თვრამეტ წელს მიუძღვნა. ის ამბობს, რომ სწორად მოიქცნენ, როცა საერთაშორისო საზოგადოების აზრი არ გაითვალისწინეს და აგვისტოს ომი მეზობელ სახელმწიფოსთან კონფლიქტის მეშვეობით რუსეთის სიმტკიცის პირველი გამოცდა იყო, რომელიც ღირსეულად ჩააბარეს.
მისი თქმით, დასავლეთს საქართველოს ბედი საერთოდ არ აინტერესებდა, ნატო-სა და ევროკავშირში გაწევრიანების დაპირებების მიუხედავად“. მედვედევი აცხადებს, რომ „დღეს თბილისი პრაგმატულ პოლიტიკას ატარებს“.
„2008 წლის აგვისტოს ტრაგიკული მოვლენებიდან 18 წელი გავიდა. ეს მოვლენები კვლავ იმის დასტურია, რომ საკუთარი მოქალაქეებისა და საკუთარი ეროვნული ინტერესების დაცვა, ე.წ. საერთაშორისო საზოგადოების აზრის გაუთვალისწინებლად, ყველაზე სწორ არჩევანს წარმოადგენს. აფხაზეთისა და სამხრეთ ოსეთის დაცვის შესახებ გადაწყვეტილებამ დასავლეთში ისტერიკა გამოიწვია. იზოლაციით და საპასუხო შედეგებით გვემუქრებოდნენ. ახლა გვესმის, რომ ეს მეზობელ სახელმწიფოსთან კონფლიქტის მეშვეობით რუსეთის სიმტკიცის პირველი გამოცდა იყო. ჩვენ ეს გამოცდა ღირსეულად ჩავაბარეთ, რითაც აფხაზეთისა და სამხრეთ ოსეთის ხალხებს წარმატებული ცხოვრებისა და განვითარების საშუალება მიეცა. ხოლო ისინი, ვინც ყველაზე ხმამაღლა გაკიცხა ჩვენი ქვეყანა, დღეს უკრაინაში სხვისი ხელით წარუმატებლად იბრძვიან.
დასავლეთმა საქართველო ჩვენ წინააღმდეგ გეოპოლიტიკური ბრძოლის უგუნურ იარაღად გამოიყენა იმ მომენტში, როდესაც ეს მისთვის ხელსაყრელი იყო. როდესაც ჩვენი მტრები მიხვდნენ, რომ ვერაფერს მიაღწევდნენ, მაშინ ის უბრალოდ ბედის ანაბარა მიატოვეს.
ვერ ვიტყოდი, რომ საქართველო განცდილი შოკისგან სრულად გამოკეთდა. დასკვნები ნამდვილად გამოტანილია. დღეს თბილისი პრაგმატულ პოლიტიკას ატარებს, თუმცა კრიმინალური რეჟიმის ქმედებებით მიყენებულ ზიანს კიდევ დიდხანს იგრძნობენ.
მედვედევის თქმით, „დასავლეთის პოლიტიკა რუსოფობიასა და რუსეთის განადგურების სურვილზეა დაფუძნებული, რისთვისაც ისინი კრიმინალებს ქირაობენ“.
მედვედევმა უკრაინის პრეზიდენტის ვოლოდიმირ ზელენსკისა და საქართველოს ყოფილი პრეზიდენტის მიხეილ სააკაშვილის შესახებ ისაუბრა.
„გასაკვირი არ არის, რომ მსგავს ბრძოლაში ფსონებს ნაძირალებზე ჩამოდიან. ევროპელი ფარისევლები ბანდიტებს, მკვლელებსა და ტერორისტებს ქირაობენ. ეს უვარგისები კი სულელები და ამბიციურები არიან. მათი მართვა და მოგვიანებით მოშორება მარტივია. მხოლოდ დაფინანსების არხების გადაკეტვა და მათგან საჯაროდ გვერდზე გადგომაა საჭირო, როგორც კი ვითარება ჩიხში შევა. გავიხსენოთ სააკაშვილის ბედი. მსგავსი სამარცხვინოები, როგორიც ის და კიეველი ნარკომანია, კოლექტიური დასავლეთისთვის სახარჯი მასალები არიან. კარგად ცნობილია, თუ რად იქცა ჰალსტუხების მღეჭავი ყოფილი ქართველი მეფუკა და როგორ მოექცნენ მას მისი პატრონები. ახლა ის უკიდურესად საცოდავ სანახაობას წარმოადგენს. კიეველი სისხლისმღვრელი ჯამბაზიც არაფრით უკეთესი არ არის და თავისი უბადრუკი „კარიერის“ დასასრულისკენ აქტიურად მიიწევს“, – თქვა მედვედევმა. მან ამავე ინტერვიუში სომხეთსაც “მძიმე ბედი“უწინასწარმეტყველა, თუ ის დასავლეთთან ინტეგრაციას გააგრძელებს.
