ფიფას პრეზიდენტ ჯანი ინფანტინოს სავარაუდო საყვარელმა უეფასგან კომპენსაცია მიიღო იმ პერიოდში, როდესაც ინფანტინო ორგანიზაციის გენერალური მდივანი იყო, – ნათქვამია Daily Telegraph-ის გამოძიებაში. ინფანტინო ბრალდებებს უარყოფს.
გამოძიების თანახმად, უეფამ ექვსნიშნა თანხა გადაუხადა ქალს, რომელსაც, სავარაუდოდ, ინფანტინოსთან ურთიერთობა ჰქონდა — მიუხედავად იმისა, რომ ინფანტინო დაქორწინებულია და ოთხი შვილი ჰყავს. ეს იმ პერიოდში ხდებოდა, როდესაც ინფანტინო უეფაში –ევროპის საფეხბურთო ასოციაციების კავშირში –მუშაობდა. ის ორგანიზაციის გენერალური მდივანი 2009-2016 წლებში იყო, რის შემდეგაც ფიფას – ფეხბურთის საერთაშორისო ფედერაციის — პრეზიდენტად აირჩიეს.
გამოცემის ინფორმაციით, ინფანტინოს ურთიერთობა ჰქონდა უეფას თანამშრომელ ქალთან, რომელსაც შედარებით დაბალი ადმინისტრაციული თანამდებობა ეკავა. ყოფილი კოლეგების თქმით, ინფანტინომ თავდაპირველად ის დააწინაურა და ხელფასი გაუზარდა, მას შემდეგ კი, რაც ამ საკითხთან დაკავშირებით უეფას მაშინდელმა პრეზიდენტმა მიშელ პლატინიმ პრეტენზია გამოთქვა, მიღწეულ იქნა შეთანხმება, რომლის მიხედვითაც ქალი ორგანიზაციას კომპენსაციის სანაცვლოდ დატოვებდა.
გადახდილი თანხა ქალის ბიზნესსკოლაში MBA-ის პროგრამაზე სწავლის ხარჯებსაც ფარავდა. ამ ბიზნესსკოლაში სწავლის საფასური წელიწადში დაახლოებით 45 ათას ფუნტს შეადგენდა, ხოლო კომპენსაციის საერთო ოდენობა ექვსნიშნა იყო.
გამოძიების თანახმად, მოგვიანებით ინფანტინომ თავისი კავშირები გამოიყენა იმისთვისაც, რომ ქალს მსგავს სფეროში ახალი, მაღალანაზღაურებადი სამსახური მიეღო.
Daily Telegraph-ის ცნობით, უეფაში დაადასტურეს, რომ ასეთი გადახდა მართლაც განხორციელდა. ორგანიზაციაში ასევე დაადასტურეს, რომ მათთვის ცნობილი იყო ინფორმაცია ქალისა და ინფანტინოს სავარაუდო ურთიერთობის შესახებ.
უეფაში აცხადებენ, რომ ყველა გადახდა იმ დროისთვის მოქმედ წესებს შეესაბამებოდა, თუმცა მას შემდეგ ორგანიზაციამ რეგულაციები „გაამკაცრა“, რათა ისინი „შეესაბამებოდეს იმ სტანდარტებს, რომლებიც თანამედროვე, მსხვილ და საზოგადოების განსაკუთრებული ყურადღების ქვეშ მყოფ ორგანიზაციებში მოქმედებს“.
ფიფაში ინფანტინოს წინააღმდეგ გაჟღერებულ ბრალდებებს უარყოფენ.
„ფიფას პრეზიდენტი ჯანი ინფანტინო კატეგორიულად უარყოფს ამ ბრალდებებს და ამბობს, რომ ისინი რეალობას აბსოლუტურად არ შეესაბამება. ნებისმიერი მინიშნება არასათანადო ქცევაზე ან წესდებისა თუ რეგულაციების დარღვევაზე ცილისმწამებლურია“, — განუცხადა ფიფას წარმომადგენელმა Telegraph-ს.
მისივე თქმით, „უეფას ან ფიფას არცერთ თანამშრომელს ბატონ ინფანტინოს ქცევასთან დაკავშირებით არასოდეს შეუტანია საჩივარი, რადგან არ ყოფილა არცერთი ინციდენტი, რომელშიც ის მონაწილეობდა“.
ჯანი ინფანტინოს კარიერა ცოტა ხნის წინ კიდევ ერთი კრიზისის გამო აღმოჩნდა საფრთხის ქვეშ — მას შემდეგ, რაც ჩაიშალა მისი გეგმა მსოფლიო ჩემპიონატებთან დაკავშირებული წილის კერძო ინვესტორებისთვის მიყიდვის შესახებ. მიუხედავად ამისა, მან ფიფას პრეზიდენტის პოსტის შენარჩუნება შეძლო.
ინფანტინოს გეგმამ, რომელიც მსოფლიო ჩემპიონატების ნაწილობრივ პრივატიზებას ითვალისწინებდა, მწვავე დაპირისპირება გამოიწვია. უეფაში შემავალი 55-ვე ეროვნული საფეხბურთო ფედერაცია ფიფას ბოიკოტით დაემუქრა.
მაროკოში გამართულ ფიფას ხელმძღვანელობის საგანგებო შეხვედრაზე ინფანტინომ აღიარა, რომ საკუთარი გეგმის წინ წაწევისას შეცდომები დაუშვა. მან ეს გეგმა განცხადებამდე ცოტა ხნით ადრე უკან გაიწვია.
შეხვედრის შემდეგ მომზადდა ბოდიშის წერილი ჯანი ინფანტინოსა და ფიფას გენერალური მდივნის, მატიას გრაფსტრიომის სახელით. მათ დაშვებული შეცდომების გამო „გულწრფელი ბოდიში“ მოიხადეს და პირობა დადეს, რომ „მსგავსი რამ მომავალში აღარ განმეორდება“.
ამავე დროს, ფიფამ ინფანტინოს მხარდამჭერი განცხადებაც გაავრცელა.
თუმცა უეფა კვლავ გეგმავს ფიფას ყველა ღონისძიების ბოიკოტს და ხაზგასმით აცხადებს, რომ ორგანიზაციამ ჯანი ინფანტინოს პრეზიდენტობის მიმართ ნდობა დაკარგა.
ამასთან, ინფანტინოს მხარდაჭერა მსოფლიოს სხვა რეგიონებში კვლავ აქვს. მის მხარდამჭერებს შორის არიან აფრიკის ფეხბურთის კონფედერაცია — CAF, სამხრეთ ამერიკის ფეხბურთის კონფედერაცია — CONMEBOL, ასევე მექსიკისა და არგენტინის საფეხბურთო ასოციაციები.
