რუსეთი ჰიბრიდულ ომს აფართოებს და ევროპაში სულ უფრო მეტ ოპერაციას ატარებს მთავრობებისა და სახელმწიფო ინსტიტუტების დესტაბილიზაციის მიზნით, — მიიჩნევს ბუნდესვერის გენერალური ინსპექტორი კარსტენ ბროიერი. ამის შესახებ მან 11 აგვისტოს, სამშაბათს, The Wall Street Journal-თან ინტერვიუში განაცხადა.
მისი თქმით, რუსეთი სისტემატურად იყენებს უპილოტო საფრენ აპარატებს, რათა ევროპული ქვეყნების საჰაერო თავდაცვის სისტემები შეამოწმოს და მათში სუსტი ადგილები გამოავლინოს. ბროიერის განცხადებით, „ჰიბრიდული თავდასხმები NATO-ს ქვეყნებში ყოველდღიურად ხდება“, განსაკუთრებით ალიანსის აღმოსავლეთ ფლანგზე.
მანამდე DW-სთან ინტერვიუში ბროიერმა, რომლის თანამდებობაც სხვა ქვეყნების შეიარაღებულ ძალებში გენერალური შტაბის უფროსის პოზიციას შეესაბამება, განაცხადა, რომ რუსეთის მხრიდან NATO-ს ქვეყნებზე შესაძლო ფართომასშტაბიანი თავდასხმა 2029 წლიდან შეიძლება გახდეს რეალური.
ბროიერი NATO-ს სამხედრო კომიტეტის თავმჯდომარის პოსტზე ერთ-ერთ მთავარ კანდიდატად ითვლება
The Wall Street Journal-ის ცნობით, ბროიერი NATO-ს სამხედრო კომიტეტის მომავალი თავმჯდომარის პოსტზე ერთ-ერთი მთავარი კანდიდატია. ახალი თავმჯდომარის არჩევა უკვე სექტემბერში იგეგმება. სამხედრო კომიტეტის თავმჯდომარე ალიანსის გენერალური მდივნის მთავარი სამხედრო მრჩეველია.
2025 წლის დეკემბერში NATO-ს გენერალურმა მდივანმა მარკ რუტემ განაცხადა, რომ რუსეთი ხუთი წლის განმავლობაში შეიძლება მზად იყოს ალიანსის წინააღმდეგ სამხედრო ძალის გამოსაყენებლად.
ინტერვიუში ბროიერმა ასევე აღნიშნა, რომ აშშ-ისგან განსხვავებით, რომელიც თავის მთავარ სტრატეგიულ მეტოქედ ჩინეთს განიხილავს, ევროპული ქვეყნებისთვის „გეოგრაფიული მიზეზების გამო“ მთავარ მოწინააღმდეგედ კვლავ რუსეთი რჩება.
ბუნდესვერის გენერალურმა ინსპექტორმა ასევე განაცხადა, რომ გერმანია, საკუთარი გეოგრაფიული მდებარეობისა და ეკონომიკის მასშტაბის გათვალისწინებით, ცდილობს ლიდერის როლი იკისროს და გახდეს „სტრატეგიული დამაკავშირებელი რგოლი“, რომელიც ერთმანეთთან სკანდინავიის, ბალტიის ქვეყნებსა და NATO-ს აღმოსავლეთ საზღვართან მდებარე სხვა სახელმწიფოებს დააკავშირებს.