კახა კალაძე პრობლემას ვერ ხედავს იმაში, რომ რუს ბლოგერს ინტერვიუ მისცა, რომელშიც რუსი ტურისტები საქართველოში დაპატიჟა და ურჩია, რომელი ქართული კერძები დააგემოვნონ.
კალაძემ განმარტება დღეს ჟურნალისტებთან გააკეთა და თქვა, რომ ბლოგერს შემთხვევით შეხვდა ერთ-ერთ კაფეში.
„არ ვიცი, ეს კონკრეტული ადამიანი ბლოგერია თუ ჟურნალისტი. რამდენიმე დღის წინ, მუნიციპალიტეტის სამუშაოებზე ვიმყოფებოდი. შემდეგ ერთ-ერთ კაფეში ყავის საყიდლად შევედი. აბსოლუტურად შემთხვევით შევხვდი ამ ქალბატონს. მითხრა, რომ თბილისზე სიუჟეტს ვაკეთებო და შეკითხვები დამისვა. ამაში პრობლემას ვერ ვხედავ. მე ახლაც ვიტყვი, რომ ყველას, ვისაც სურვილი აქვს ჩვენს ქვეყანაში სტუმრობის, ნებისმიერ დროს შეუძლია ჩამოსვლა, მიუხედავად მისი წარმოშობისა. რუსი იქნება, უკრაინელი, იტალიელი, ამერიკელი თუ სხვა ქვეყნის წარმომადგენელი, ყველას შეუძლია ჩამოსვლა და სასიამოვნო დღეების გატარება. ისინი დახარჯავენ ფულს, ეს წაადგება ჩვენს ეკონომიკას და იმ ადამიანებს, ვინც ტურიზმის სფეროში საქმიანობენ. შეკითხვა შეეხებოდა სტუმარმასპინძლობას და მეც ვუპასუხე. რა თქმა უნდა, ტრადიციული საჭმელების გარდა, ჩვენ ბევრი ღირსშესანიშნაობა გვაქვს. სწორედ ამიტომ არის ჩვენი ქვეყანა საინტერესო და ამიტომ აქვთ მსოფლიოს სხვადასხვა ქვეყნიდან ჩამოსულ სტუმრებს ინტერესი. მათ შორის ჩვენი სამზარეულო და ქართული ღვინო სარგებლობს დიდი პოპულარობით, რადგან ეს არის ჩვენი კულტურის, ადათ-წესების ნაწილი”, – განაცხადა კალაძემ.
„პაზლევიჩ ვალენტინა“ – სოციალურ ქსელში ამ სახელის მქონე მომხმარებელმა კალაძესთან ინტერვიუ 9 აგვისტოს გამოაქვეყნა და ის წარადგინა, როგორც „მსოფლიოში სტილით ყველაზე გამორჩეული პოლიტიკოსი“.
„მსოფლიოში სტილით ყველაზე გამორჩეულ პოლიტიკოსთან, კახა კალაძესთან შეხვედრის შანსი უმნიშვნელოდ მცირეა, მაგრამ არასდროს ნულის ტოლი“ – ამბობს ბლოგერი. ის კალაძეს ქართული სტუმართმოყვარეობისა და სამზარეულოს შესახებ რუსულად ესაუბრება და კალაძეც რუსულად პასუხობს.
მან რუსი ტურისტები საქართველოში დაპატიჟა და ბლოგერის თხოვნით, ურჩია მათ დააგემოვნონ ის ქართული კერძები, რომლებიც თავადაც უყვარს.
„მე, მაგალითად, ძალიან მიყვარს ხინკალი. ძალიან მიყვარს ქაბაბი, როგორც ამზადებენ. ძალიან მიყვარს იმერული და აჭარული ხაჭაპური. ძალიან მიყვარს, ჩვენთან რომ ამზადებენ სხვადასხვა წასახემსებლებს, წითელი ღვინო… ბევრი ღვინის სმა არ მიყვარს, მაგრამ ერთი ჭიქა წითელი ღვინო ორგანიზმისთვისაც ძალიან კარგია. ჩამოდით საქართველოში, თბილისში, ჩვენ ეს ყოველთვის გვიხარია“, – ამბობს კალაძე ინტერვიუში.