ცხინვალის რეჟიმი თვლის, რომ საქართველომ კობახიძის სახით აღიარა სააკაშვილი დამნაშავედ აგრესიაში, შესაბამისად, პასუხისმგებლობა ქვეყანას უნდა დაეკისროს
რუსეთის მიერ ოკუპირებული ცხინვალი აკრიტიკებს აგვისტოს ომის მე-18 წლისთავზე ქართველოს საგარეო უწყების განცხადებას, ამავე განცხადებაში კი პრემიერ ირაკლი კობახიძის სიტყვები მოჰყავს იმის დასტურად, რომ ექსპრეზიდენტი მიხეილ სააკაშვილი „ომის დამნაშავეა“, ამიტომ „პასუხისმგებლობა ქვეყანას უნდა დაეკისროს“.
„ქართული ოცნების“ ლიდერებმა 8 აგვისტოს პოლიტიკური განცხადებებისას ომის დაწყებაში კიდევ ერთხელ დაადანაშაულეს „ნაციონალური მოძრაობა.
კითხვაზე პასუხად, ნიშნავს თუ არა ეს მათი მხრიდან მტკიცებას, რომ ომი საქართველომ დაიწყო, იმდროინდელი ხელისუფლება საქართველოსგან გამიჯნეს.
თუმცა, ასე არ ფიქრობენ ცხინვალში და თვლიან, რომ კობახიძემ ოფიციალურად აღიარა საქართველოს ყოფილი პრეზიდენტი სამხედრო აგრესიაში დამნაშავედ, რაც ნიშნავს, რომ აგრესია ქართულმა სახელმწიფომ განახორციელა.
9 აგვისტოს გავრცელებულ განცხადებაში სამხრეთ ოსეთის დე ფაქტო საგარეო საქმეთა სამინისტრო წერს, რომ საქართველოს საგარეო უწყების 8 აგვისტოს განცხადებამდე „სულ რაღაც ერთი დღით ადრე, საქართველოს პოლიტიკურმა ხელმძღვანელობამ, კობახიძის სახით, ოფიციალურად აღიარა საქართველოს ყოფილი პრეზიდენტი სააკაშვილი სამხედრო აგრესიაში დამნაშავედ.
საკმაოდ ნათელია, რომ დამნაშავე მხოლოდ სააკაშვილი არ არის. სახელმწიფოს მეთაურის რანგში, მას ჰქონდა მანდატი, ესაუბრა საქართველოს სახელმწიფოს სახელით, გაეცა კრიმინალური ბრძანებები და განეხორციელებინა ანტიოსური და ანტიაფხაზური პოლიტიკა.
ამიტომაც, 2008 წლის აგვისტოს ომზე პასუხისმგებლობა უნდა დაეკისროს ქვეყანას, როგორც ამ პოლიტიკის გამტარს, – მათ შორის სააკაშვილის რეჟიმის ფიგურებს, როგორც მისი პოლიტიკის ობიექტებს“, – აცხადებენ დე ფაქტო საგარეო უწყებაში.
„ქართული ოცნების“ მთავრობა 2008 წლის აგვისტოს ომის დაწყების თარიღად 8 აგვისტოს მიიჩნევს და მუხათგვერდის ძმათა სასაფლაოზეც გმირთა მემორიალთან 8 აგვისტოს მივიდა. ოცნების ლიდერებმა 2008 წლის აგვსტოს ომის დაწყებაში მიხეილ სააკაშვილის ხელისუფლების პასუხისმგებლობაზე ილაპარაკეს.
8 აგვისტოს განცხადება გამოაქვეყნა საგარეო საქმეთა სამინისტრომ, რომელშიც ნათქვამია, რომ რუსეთი დღემდე არ ასრულებს ევროკავშირის შუამავლობით 2008 წლის 12 აგვისტოს დადებულ ცეცხლის შეწყვეტის შეთანხმებას, აგრძელებს ოკუპირებულ რეგიონებში კონტროლის გაფართოებას, მათ მილიტარიზაციას და ფაქტობრივი ანექსიისკენ მიმართულ ნაბიჯებს.საგარეო საქმეთა სამინისტრო რუსეთს მოუწოდებს, შეწყვიტოს საქართველოს ტერიტორიების უკანონო ოკუპაცია, შეასრულოს 2008 წლის 12 აგვისტოს შეთანხმებით ნაკისრი ვალდებულებები, გაიყვანოს სამხედრო ძალები საქართველოს ტერიტორიიდან და უზრუნველყოს იძულებით გადაადგილებულ პირთა და ლტოლვილთა საკუთარ სახლებში უსაფრთხო და ღირსეული დაბრუნება.
