მოსკოვის კუზმინსკის რაიონულმა სასამართლომ უპილოტო საფრენი აპარატების მწარმოებელი კომპანია „დრონ სოლუშნსის“ მოქმედი გენერალური დირექტორი ვიაჩესლავ ბარბასოვი და მისი წინამორბედი ირაკლი ხაზალია წინასწარ პატიმრობაში გაუშვა. ამის შესახებ გაზეთი „კომერსანტი“ წერს.
ბარბასოვსა და ხაზალიას განსაკუთრებით დიდი ოდენობით თაღლითობას ედავებიან. რუსეთის სისხლის სამართლის კოდექსის მიხედვით, ამ დანაშაულისთვის მათ 10 წლამდე თავისუფლების აღკვეთა ემუქრებათ.
„დრონ სოლუშნსი“ მოსკოვში 2018 წელს დარეგისტრირდა. კომპანიის ვებგვერდზე ნათქვამია, რომ ის ქმნის უპილოტო საავიაციო სისტემებს, მათთვის განკუთვნილ პროგრამულ უზრუნველყოფასა და ნეირონულ ქსელებზე დაფუძნებულ კომპიუტერული ხედვის სისტემებს.
კომპანიის განცხადებით, მისი პროდუქცია განკუთვნილია „ინსპექტირების, მიწოდებისა და სამძებრო-სამაშველო სამუშაოებისთვის“ და შეუძლია მუშაობა „ყველაზე რთულ პირობებში — არქტიკიდან აფრიკამდე“.
კომპანიის 40% ბარბასოვს ეკუთვნის, კიდევ 23%-ს კი რუსეთის მრეწველობისა და ვაჭრობის სამინისტროს ეროვნული ტექნოლოგიური ინიციატივის პროექტების მხარდაჭერის ფონდი აკონტროლებს.
2024 წლის დეკემბერში გამოცემა Russian Business წერდა, რომ „დრონ სოლუშნსში“ 80 მილიონი რუბლის ინვესტიცია განახორციელეს მოსკოვის ვენჩურულმა ფონდმა და ფონდმა „ვოსხოდმა“, რომლის მთავარი ინვესტორი ვლადიმირ პოტანინის ჯგუფი „ინტეროსია“.
„დრონ სოლუშნსის“ უპილოტო აპარატი პუტინსაც წარუდგინეს
აპრილში რუსეთის ჯანდაცვის მინისტრმა მიხაილ მურაშკომ ვლადიმირ პუტინს კომპანიის მიერ შექმნილი თვითმფრინავის ტიპის დრონი „აისტი“ წარუდგინა, რომელსაც ვერტიკალური აფრენა და დაშვება შეუძლია.
„დრონ სოლუშნსის“ ვებგვერდზე აღნიშნულია, რომ ეს უპილოტო საფრენი აპარატი განკუთვნილია „დიდ ტერიტორიებზე დაცვის, ინსპექტირებისა და ტვირთის მიწოდებისთვის“, მათ შორის ნავთობისა და გაზის მილსადენების პატრულირებისა და ელექტროგადამცემი ხაზების, ანძების, ხიდებისა და სხვა ინფრასტრუქტურის ვიზუალური და თერმული ინსპექტირებისთვის.
დრონის ფრენის მაქსიმალური მანძილი 400 კილომეტრამდეა და მას 10 კილოგრამამდე ტვირთის გადატანა შეუძლია.
რუსეთის სახელმწიფო ტელევიზიის პორტალ Vesti.Ru-ს ცნობით, მურაშკომ „აისტი“ პუტინს წამლების მიწოდებისთვის განკუთვნილ სისტემად წარუდგინა.
რუსეთში დრონების მწარმოებლების წინააღმდეგ საქმეები გახშირდა
მაისში The Insider წერდა იმ კომპანიების შემოწმების შესახებ, რომლებიც სახელმწიფო დახმარებას ეროვნული პროექტის — „უპილოტო საავიაციო სისტემების“ — ფარგლებში იღებდნენ.
მაშინ კომპანია „ტრანსპორტ ბუდუშჩეგოს“ ყოფილი გენერალური დირექტორი იური კოზარენკო დააკავეს.
ივლისის ბოლოს კი „ტრანსპორტ ბუდუშჩეგოსთან“ დაკავშირებული საქმის ფარგლებში დააკავეს მილიარდერი ვალერი კუსტოვი, ჯგუფ „ეფკოს“ სხვა ხელმძღვანელები და რუსეთის მრეწველობისა და ვაჭრობის სამინისტროს ერთ-ერთი მაღალჩინოსანი.
გამოძიების ყურადღება მიიპყრო პროექტმა, რომელიც 750 უპილოტო საფრენი აპარატის სერიულ წარმოებას ითვალისწინებდა და რომლისთვისაც სახელმწიფომ 4,5 მილიარდი რუბლის სუბსიდია გამოყო.
