ესპანეთი იტალიიდან ჩასული მოგზაურებისთვის შეზღუდვების დაწესებით დაიმუქრა, თუ რომი 9 აგვისტომდე არ გააუქმებს სასაზღვრო კონტროლს, რომელიც გასულ კვირას ესპანეთის ავტონომიურ ქალაქ სეუტაში მიგრანტების მასობრივი ნაკადის გამო შემოიღო. სეუტა გიბრალტარის სრუტის აფრიკულ სანაპიროზე მდებარეობს და მაროკოს ესაზღვრება. ამის შესახებ პარასკევს, 7 აგვისტოს, სააგენტო Reuters-მა გაავრცელა ინფორმაცია.
იტალიამ საპასუხოდ განაცხადა, რომ მადრიდისგან „ულტიმატუმებს ან დიქტატს“ არ მიიღებს და დასძინა, რომ ესპანეთიდან ჩასული მესამე ქვეყნების მოქალაქეებისთვის შენგენის რეჟიმის შეჩერებას სულ მცირე 15 აგვისტომდე შეინარჩუნებს.
იტალიას სურს დარწმუნდეს, რომ ახალი მიგრაციული ტალღა არ დაიწყება
ჯორჯა მელონის ადმინისტრაციის ინფორმაციით, ესპანეთის ხელისუფლებამ თავად გააფრთხილა პარტნიორები, რომ 15 აგვისტოს სეუტაში მიგრანტების ახალი ნაკადია მოსალოდნელი.
განცხადებაში ნათქვამია, რომ იტალიის მთავრობა რეჟიმს მხოლოდ მას შემდეგ გადახედავს, რაც დარწმუნდება, რომ ახალი მიგრაციული ტალღა და იტალიის უსაფრთხოებისთვის საფრთხე არ არსებობს.
ესპანეთის სამოქალაქო გვარდიამ მანამდე განაცხადა, რომ მისთვის ცნობილია ინტერნეტში გავრცელებული მოწოდებების შესახებ, რომლებიც 15 აგვისტოს სეუტის საზღვრის გადაკვეთის ახალ მცდელობას ეხება. თუმცა ჯერ უცნობია, რამდენი ადამიანი შეიძლება შეუერთდეს ორგანიზატორებს.
Reuters-ის შეფასებით, საუბარია ჯორჯა მელონის მემარჯვენე იტალიურ მთავრობასა და ესპანეთის სოციალისტი პრემიერ-მინისტრის, პედრო სანჩესის კაბინეტს შორის ურთიერთობების ყველაზე დაბალ ნიშნულზე.
მიგრანტების მასობრივი შეღწევა მაროკოდან სეუტაში
გასულ კვირას ათიათასობით ადამიანი მაროკოდან სეუტაში ზღვით ან ხმელეთით უკანონოდ გადავიდა. ქალაქის მოსახლეობა დაახლოებით 85 ათასია.
მათ, ვინც ზღვით გადაადგილდებოდა, თვითნაკეთი მცურავი საშუალებები, მათ შორის გასაბერი რგოლები და ავტომობილის საბურავები გამოიყენეს. ესპანეთის შინაგან საქმეთა სამინისტროში განაცხადეს, რომ ქვეყანაში ჩასულთა უმეტესობა 30 წლამდე ახალგაზრდები არიან.
ესპანეთის ექსკლავის ტერიტორიაზე მოხვედრის მცდელობისას დაახლოებით ასი ადამიანი დაიღუპა.
მადრიდის მთავრობამ 2021 წლის შემდეგ პირველად გაგზავნა სამხედროები ჩრდილოეთ აფრიკაში მდებარე თავის ექსკლავში წესრიგის დასაცავად.
ესპანეთის სამოქალაქო გვარდიამ 1 აგვისტოს ზღვაში 500 მეტრი სიგრძის მცურავი ბარიერის მონტაჟი დაიწყო, რომლის მიზანიც ახალი მიგრანტებისთვის გზის გადაკეტვაა.
გარდა ამისა, საზღვრის გასწვრივ განათავსეს ესპანეთის სამხედრო-საზღვაო ძალების მიერ გადაცემული დამაგრებული ტივტივების ჯაჭვი. მათ შორის დატოვებული გასასვლელი კი სამოქალაქო გვარდიის კატარღებს საშუალებას მისცემს, ბარიერი დღე-ღამის განმავლობაში გააკონტროლონ.