აშშ-ის იუსტიციის სამინისტრომ განაცხადა, რომ გამოავლინა ქსელი, რომელიც, უწყების ცნობით, რუსეთის სპეცსამსახურების დავალებით ევროპაში დივერსიებსა და ოპოზიციონერების მკვლელობებს ამზადებდა. სამინისტროს მონაცემებით, ამ ქსელის წევრები სულ მცირე ორი რუსი ოპოზიციონერის ფიზიკური ლიკვიდაციისთვის შემსრულებლებს ეძებდნენ და ასევე სამხედრო და სამოქალაქო ობიექტების წინააღმდეგ დივერსიების მოწყობას გეგმავდნენ.
აშშ-ის იუსტიციის სამინისტრომ განაცხადა, რომ გაასაჯაროვა ბრალდებები ხუთი ადამიანის წინააღმდეგ, რომლებიც, უწყების მონაცემებით, რუსეთის სადაზვერვო სამსახურებისთვის მუშაობდნენ.
სამინისტროს განცხადებაში ნათქვამია, რომ ეს ქსელი „აშშ-სა და სხვა ქვეყნებში მყოფ პირებს უხდიდა ან ცდილობდა გადაეხადა თანხა წინასწარი თვალთვალის ჩატარებისა და მიზანმიმართული მკვლელობების განხორციელებისთვის; ასევე თავის თანამზრახველებს ავალებდა, ევროპულ ქვეყნებში, უკრაინასთან დაკავშირებული ან ასეთად მიჩნეული სამოქალაქო და სამხედრო ინფრასტრუქტურის წინააღმდეგ ტერორისტული აქტები ჩაედინათ ან მათი განხორციელება ეცადათ“.
ქსელის გამოსავლენად ოპერატიულ სამუშაოს FBI აწარმოებდა.
„დღეს გამოცხადებული ბრალდებები FBI-ის არაერთი საველე ოფისის, დანაყოფისა და პარტნიორი უწყების გამორჩეული მუშაობის შედეგია. მათ ერთობლივად ჩაშალეს რუსეთის მცდელობები, ძალადობრივი ქმედებები განეხორციელებინა ჩვენი ქვეყნის დედაქალაქსა და შეერთებული შტატების სხვა ნაწილებში“, — განაცხადა FBI-ის დირექტორის თანაშემწემ დარენ კოქსმა.
ვის წაუყენეს ბრალი
აშშ-ის იუსტიციის სამინისტროს განცხადებაში ხუთი პირია დასახელებული. ესენი არიან:
63 წლის იური ხრამეევი, რომელიც საქმეში ასევე „პოლკოვნიკ იურის“ სახელით ფიგურირებს — რუსეთის სპეცსამსახურების ყოფილი პოლკოვნიკი, რომელიც რუსი ოპოზიციონერების მკვლელობებისთვის ადამიანების გადაბირებაში მონაწილეობდა;
მისი 27 წლის შვილი, კირილ ხრამეევი — FSB-ის ოფიცერი;
35 წლის ოემის რომაგოსა დურუტი — კუბის მოქალაქე;
35 წლის იაიდელ დელგადო სუარესი, მეტსახელად „ვიკინგი“ — კუბის მოქალაქე;
22 წლის ანხელ ედუარდო კასტრო — ვენესუელის მოქალაქე.
კუბელი ოემის რომაგოსა დურუტის შესახებ მედიაში ადრეც წერდნენ, ლიტვაში დივერსიულ საქმიანობასთან დაკავშირებით.
Deutsche Welle-მ, საქმის დოკუმენტების გაცნობის შემდეგ, გაარკვია, რომ 2024 წელს პირი, რომელიც ფსევდონიმ „დიოსით“ მოქმედებდა, მის მიერ გადაბირებულ შემსრულებლებს ავალებდა, ცეცხლი წაეკიდებინათ სამშენებლო მასალების საწყობებისთვის პოლონეთში, ავტობუსების პარკისთვის ჩეხეთში, ნარჩენების გადამამუშავებელი საწარმოსთვის რუმინეთში, ასევე გაენადგურებინათ ლიეტუვაში წარმოებული და უკრაინისთვის განკუთვნილი აღჭურვილობა.
გამოცემის ინფორმაციით, ფსევდონიმ „დიოსის“ უკან რუსეთში მცხოვრები კუბის მოქალაქე ოემის რომაგოსა დურუტი დგას, რომელიც ლიეტუვის სამართალდამცავ ორგანოებს ძებნაში ჰყავთ გამოცხადებული.
რაში ადანაშაულებენ მათ
აშშ-ის იუსტიციის სამინისტროს ინფორმაციით, ქსელის წევრები რუსეთის სპეცსამსახურების დავალებით მოქმედებდნენ.
2026 წლის ზაფხულში ქსელმა აშშ-ში მცხოვრები პირი გადაიბირა ცნობილი რუსი ოპოზიციონერის სათვალთვალოდ, რომელიც შეერთებულ შტატებში ცხოვრობს. ოპოზიციონერის ვინაობა არ სახელდება — იუსტიციის სამინისტროს განცხადებაში ის მოხსენიებულია როგორც „მსხვერპლი №1“.
სუარესმა გადაბირებულ პირს თვალთვალისთვის საჭირო ინფორმაცია გადასცა. მან დამკვეთს გაუგზავნა პოტენციურ მსხვერპლთან დაკავშირებული ადგილების ფოტოები და ვიდეოჩანაწერები, რის შემდეგაც სუარესმა და კასტრომ მას 40 ათასი დოლარის სანაცვლოდ მკვლელობის ჩადენა შესთავაზეს.
გარდა ამისა, აშშ-ის იუსტიციის სამინისტროსა და FBI-ის მონაცემებით, იგივე სუარესი ცდილობდა შეერთებულ შტატებში კიდევ რამდენიმე პირის გადაბირებას არა მხოლოდ „მსხვერპლი №1“-ის, არამედ სხვა სამიზნეების თვალთვალისა და მკვლელობისთვის.