აშშ-ის იუსტიციის დეპარტამენტის ოფიციალური ინფორმაციით, საქართველოდან შტატებში 36 წლის რუსი ვებდეველოპერის, სერგეი ფილიმონოვის ექსტრადიცია განხორციელდა. დაკავებულს მასშტაბურ საერთაშორისო კიბერდანაშაულსა და ამერიკული ბანკებიდან მილიონობით დოლარის მოპარვაში ედება ბრალი.
პირველი სასამართლო პროცესი ჯორჯიის შტატის ფედერალურ სასამართლოში უკვე გაიმართა. გამოძიების ფედერალური ბიუროს მასალების მიხედვით, ფილიმონოვი იყო ტრანსნაციონალური ჰაკერული ქსელის ტექნიკური ხელმძღვანელი, რომელიც წამყვანი ამერიკული ბანკების ვებგვერდების ყალბ ასლებს (ე.წ. Spoofed Domains) ქმნიდა.
ჰაკერები Google-სა და სხვა საძიებო სისტემებში პირველ სარეკლამო ადგილებს ყიდულობდნენ. როდესაც ადამიანები ბანკის საიტზე შესვლას ცდილობდნენ, ისინი ამ ყალბ, რეკლამირებულ ბმულებზე გადადიოდნენ. მომხმარებლებს ეგონათ, რომ საკუთარი ბანკის გვერდზე იყვნენ და პაროლები შეჰყავდათ, თუმცა ფილიმონოვის მიერ შექმნილი ფარული ბაზა ამ მონაცემებს მომენტალურად იპარავდა. ამის შემდეგ, კრიმინალები მოპარული პაროლებით მსხვერპლთა რეალურ ანგარიშებზე შედიოდნენ და ფულს ოფშორებში რიცხავდნენ.
ოფიციალური ცნობით, ჰაკერების ინტერაქტიულ ბაზაში 5 000-ზე მეტი ამერიკელი მომხმარებლის მოპარული საბანკო მონაცემები ინახებოდა. მხოლოდ ორ კონკრეტულ ამერიკულ ბანკს ამ სქემით 6.3 მილიონზე მეტი აშშ დოლარი მოჰპარეს, ხოლო ქსელის მიერ მიყენებული ჯამური პოტენციური ზარალი 28 მილიონ დოლარს აღწევს.
ბრალდებულს წინასწარ შეთანხმებული ჯგუფური საბანკო და ელექტრონული თაღლითობის, დამამძიმებელ გარემოებებში პერსონალური მონაცემების მართლსაწინააღმდეგო მითვისებისა და თაღლითური გზით მოპოვებული ფინანსური მონაცემთა ბაზების ფლობის მუხლები აქვს წარდგენილი. დანაშაულის დამტკიცების შემთხვევაში, მას აშშ-ის კანონმდებლობით მაქსიმალური სასჯელი — 175 წლით თავისუფლების აღკვეთა ემუქრება, ამჟამად კი აშშ-ის ფედერალურ პატიმრობაში იმყოფება.
სერგეი ფილიმონოვი ამერიკული მართლმსაჯულებისგან იმალებოდა და იგი საქართველოს სამართალდამცავმა უწყებებმა დააკავეს აშშ-ის გამოძიების ფედერალურ ბიუროსთან (FBI) მჭიდრო კოორდინაციით.