“გუშინ პარლამენტის სხდომაზე საზარელი ინციდენტი მოხდა “- ამ სიტყვებით ცოტა ხნის წინ ფრაქციის “პატრიოტთა ალიანსის” ლიდერმა ადა მარშანიამ პარლამენტის წევრებს მიმართა და გუშინდელ პლენარულ სხდომაზე, სხდომის წამყვანის თამარ ჩუგიშვილის მხრიდან ემზარ კვიციანისთვის მიკროფონის გათიშვა გააპროტესტა.
ადა მარშანიას თქმით, მომხდარს “პატრიოტები” პარლამენტის ეთიკის საბჭოში გააპროტესტებს, რათა გუშინდელ სესიაზე მომხდარი ფაქტი განიხილოს.
“პარლამენტის პირველმა ვიცე-სპიკერმა თამარ ჩუგოშვილმა ემზარ კვიციანს მიკროფონი გამოურთო და შეაფასა მისი გამოსვლა, როგორც დისკრიმინაციული და არაეთიკური. უფრო მეტიც, მან გაბედა და ემზარ კვიციანს მიკროფონი იმ დროს გამოურთო, როცა პატრიარქის ქადაგებას კითხულობდა და მას ციტირებდა – ესეც შეაფასა როგორც დისკრიმინაციული და არაეთიკური ტექსტი“, – განაცხადა ადა მარშანიამ.
