მოსკოვის ნავთობგადამამუშავებელი ქარხანა, რომელზეც უკრაინამ ამ თვეში ორჯერ განახორციელა დრონული დარტყმა, სავარაუდოდ, წელს ვეღარ განაახლებს წარმოებას. Reuters-მა ეს ინდუსტრიის წყაროებზე დაყრდნობით 24 ივნისს გამოაქვეყნა.
ქარხანა, რომელიც მოსკოვის სამხრეთ გარეუბანში მდებარეობს, რეგიონის საწვავის უმსხვილეს მიმწოდებელს წარმოადგენს. ივნისში განხორციელებული ორი დარტყმის შედეგად მას მუშაობა სრულად შეუჩერდა.
16 ივნისის დარტყმამ გამოიყვანა მწყობრიდან ELOU-AVT-6 — ნედლი ნავთობის გადამამუშავებელი ძირითადი დანადგარი, რომლის სიმძლავრე 140 000 ბარელს დღეში შეადგენს. 18 ივნისის მეორე დარტყმამ კი ქარხნის მეორე ძირითადი საწარმოო ერთეული დააზიანა.
ორმა ინდუსტრიულმა წყარომ გამოცემას განუმარტა, რომ შეკეთებას მინიმუმ ნახევარი წელი დასჭირდება. ქარხანას მართავს Gazprom Neft, თუმცა კომპანიამ კომენტარის მოთხოვნას არ უპასუხა.
ქარხანამ 2024 წელს 11,6 მილიონი ტონა ნედლი ნავთობი გადაამუშავა და წარმოება 2,9 მილიონი ტონა ბენზინი და 3,2 მილიონი ტონა დიზელის საწვავი.
უკრაინამ 2026 წლის დასაწყისიდან გააძლიერა შორი მოქმედების დრონული დარტყმები რუსეთის ენერგეტიკულ ობიექტებზე, მათ შორის — მოსკოვსა და მის მიმდებარე ტერიტორიებზე. უკრაინული დარტყმების ეფექტი ქვეყნის მასშტაბით იგრძნობა: რუსეთის ათზე მეტ რეგიონში საწვავის გაყიდვაზე შეზღუდვები შემოიღეს, ხოლო კრემლმა უკვე დააწესა ბენზინის ექსპორტის დროებითი აკრძალვა
