საფრანგეთის ხელისუფლებამ RT France-ის ყოფილი მთავარი რედაქტორის, ქსენია ფიოდოროვას, ქვეყნიდან გაძევების გადაწყვეტილება მიიღო.ამის შესახებ გაზეთი Libération წერს. მანამდე ცნობილი გახდა, რომ იგი მუშაობას მემარჯვენე კონსერვატორი მილიარდერისა და მედიამაგნატის ჰოლდინგში შეუდგა.
როგორც გამოცემას ფიოდოროვას ადვოკატმა განუცხადა, პარიზის პოლიციის პრეფექტურამ მას გადასცა მინისტრის ბრძანება მისი დეპორტაციის შესახებ. დოკუმენტის თანახმად, RT-ის ყოფილი მთავარი რედაქტორის ქცევა „სახელმწიფოს ფუნდამენტურ ინტერესებს ზიანს აყენებს“, ხოლო მისი ქვეყანაში ყოფნა „საზოგადოებრივი წესრიგისთვის უკიდურესად სერიოზულ და აქტუალურ საფრთხეს წარმოადგენს“.
გარდა ამისა, დადგენილებაში ნათქვამია, რომ ფიოდოროვა „რუსეთის ხელისუფლების მიერ მართული დეზინფორმაციული კამპანიების გამავრცელებელია“, რომელთა მიზანიც საფრანგეთში „საზოგადოებრივი წესრიგის დესტაბილიზაციაა“.
მაკრონი: ფიოდოროვა პროპაგანდისტი და კრემლის გავლენის ინსტრუმენტია
ტელეკომპანია RT France-მა მაუწყებლობა 2023 წლის იანვარში, ევროპული სანქციების დაწესების შემდეგ შეწყვიტა. არხის დახურვის შემდეგ ფიოდოროვა საფრანგეთში დარჩა და ფრანგულ ენაზე მემუარები გამოაქვეყნა.
2026 წლის მაისში ცნობილი გახდა, რომ ფიოდოროვამ საერთაშორისო ამბების კომენტირება და საკუთარი ყოველკვირეული რუბრიკის წაყვანა დაიწყო მემარჯვენე-კონსერვატიულ ტელეარხ CNews-ზე, რადიოსადგურ Europe 1-ზე და გაზეთ Le Journal du Dimanche-ში. ეს მედიასაშუალებები ფრანგ მილიარდერსა და მედიამაგნატ ვენსან ბოლორეს ეკუთვნის.
გაზეთი Le Monde ფიოდოროვას ბოლორეს პროტეჟედ მოიხსენიებდა. სწორედ ბოლორემ გამოსცა მისი მემუარებიც საკუთარ გამომცემლობა Fayard-ში. სააგენტო AFP-ის ცნობით, ფიოდოროვას დამსაქმებლებმა განაცხადეს, რომ მის გაძევებას „სიტყვის თავისუფლებაზე განსაკუთრებით მძიმე თავდასხმად“ მიიჩნევენ.
საფრანგეთის პრეზიდენტმა ემანუელ მაკრონმა ფიოდოროვას ჯერ კიდევ 2017 წელს უწოდა პროპაგანდისტი და კრემლის გავლენის ინსტრუმენტი. AFP-ის ცნობით, მიმდინარე წლის ივნისში, ბოლორეს მედიაჰოლდინგში მისი საქმიანობის კომენტირებისას, მაკრონმა ხაზი გაუსვა, რომ საკუთარი პოზიცია არ შეუცვლია.
