ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა, რუსეთის გაძლიერებული თავდასხმების ფონზე ევროკავშირის ქვეყნებს მოუწოდა, უკრაინას გადასცენ რაკეტა-გადამჭერები, რომელთა შენახვის ვადა მალე იწურება.
ამის შესახებ РБК-Украина ევროკავშირის უმაღლესი წარმომადგენლის საგარეო საქმეთა და უსაფრთხოების პოლიტიკის საკითხებში, კაია კალასის ოფიციალურ განცხადებაზე დაყრდნობით წერს. კალასმა განცხადება ევროკავშირის თავდაცვის მინისტრების არაფორმალური შეხვედრის წინ გააკეთა.
მისი თქმით, ასეთი გადაწყვეტილება უკრაინის მოსახლეობის დაცვას გააძლიერებს რუსეთის მიმდინარე თავდასხმების ფონზე.
„ივლისი და აგვისტო უკრაინის მშვიდობიანი მოსახლეობისთვის ყველაზე მომაკვდინებელი თვეები იყო. რუსეთი ესკალაციას აძლიერებს, რათა უკრაინელებს რაც შეიძლება მეტი ზიანი მიაყენოს და მათი წინააღმდეგობა გატეხოს. უკრაინელები მტკიცედ დგანან და ჩვენ მათ მხარი უნდა დავუჭიროთ. მთავარი საკითხი საჰაერო თავდაცვაა“, — ციტირებს გამოცემა ევროპული დიპლომატიის ხელმძღვანელს.
„ჩვენ ვიცით, რომ ზოგიერთ ქვეყანას აქვს რაკეტა-გადამჭერები, რომელთა შენახვის ვადა მალე იწურება. ძალიან კარგი იქნებოდა, თუ მათ უკრაინას გადასცემდნენ, რათა ქვეყანამ ისინი საკუთარი მოსახლეობის დასაცავად გამოიყენოს“, — განაცხადა კაია კალასმა.
მისივე თქმით, პარალელურად გრძელდება მუშაობა უკრაინის მონაწილეობით ევროპული რაკეტა-გადამჭერების ერთობლივ წარმოებაზე.