იტალიაში, გაეტის პოლიციამ საქართველოს სამი მოქალაქე ქურდობის ფაქტზე დანაშაულის ჩადენისას დააკავა. ამის შესახებ იტალიური მედია წერს. მათ დამამძიმებელ გარემოებაში ქურდობაში ედებათ ბრალი. ერთ-ერთ მათგანს კი, რომელსაც დიდი ზომის დანა აღმოაჩნდა, დამატებით იარაღის ან დაზიანების მისაყენებლად განკუთვნილი ნივთის უკანონო ტარებისთვისაც წაუყენეს ბრალი.
პოლიციის ოპერაცია 112-ის საგანგებო ნომერზე შესული შეტყობინების შემდეგ დაიწყო. მოქალაქემ პოლიციას აცნობა, რომ გაეტაში, სანტ-აგოსტინოს სანაპიროზე საეჭვო პირები ქოლგებს შორის ფარულად გადაადგილდებოდნენ და, სავარაუდოდ, დამსვენებლების უყურადღებოდ დატოვებული ჩანთების მოპარვას ცდილობდნენ.
სამი მამაკაცის ქცევა მაშველმა შენიშნა და მათ თვალყური ადევნა, რათა გაერკვია, რას აკეთებდნენ. როდესაც დაინახა, რომ ისინი უყურადღებოდ დატოვებულ ჩანთას იღებდნენ, პოლიციას დაუკავშირდა.
შემთხვევის ადგილზე გაეტის პოლიციის კომისარიატის საპატრულო ეკიპაჟი მივიდა, რომელსაც საგზაო პოლიციის პატრულიც დაეხმარა. მათ იქ საქართველოს ორი მოქალაქე დახვდათ, რომლებიც პოლიციის მისვლამდე ადგილობრივ პოლიციას ჰყავდა შეჩერებული. მოგვიანებით დააკავეს მესამე მამაკაციც, რომელიც რამდენიმე თვითმხილველმა ამოიცნო. გამოძიების ვერსიით, ის ქურდობის დროს ე.წ. „მაყურებლის“ ფუნქციას ასრულებდა და გარემოს აკონტროლებდა.
პოლიციამ ადგილზე მყოფი პირების ჩვენებები და დაზარალებულთა საჩივრები მიიღო. იმის გათვალისწინებით, რომ ეჭვმიტანილები დანაშაულის ჩადენისას იქნენ დაკავებული, სამივე მათგანი დააპატიმრეს. ერთ-ერთ მათგანს დანა აღმოაჩნდა, რის გამოც მას დამატებით უკანონო იარაღის ან დაზიანების მისაყენებლად განკუთვნილი ნივთის ტარებაში წაუყენეს ბრალი.
საჭირო პროცედურების დასრულების შემდეგ, კასინოს პროკურატურის გადაწყვეტილებით, სამივე შინაპატიმრობაში გადაიყვანეს სასამართლო სხდომამდე, სადაც დაკავების კანონიერება უნდა განეხილათ.
კასინოს სასამართლოს წინასწარი გამოძიების მოსამართლემ პროკურატურის მოთხოვნა დააკმაყოფილა და სამივე პირის დაკავება კანონიერად ცნო. მათ აღკვეთის ღონისძიების სახით დაეკისრათ ვალდებულება, კვირაში სამჯერ — ხუთშაბათს, შაბათსა და კვირას — პოლიციაში გამოცხადდნენ. თითოეული ეჭვმიტანილისთვის გამოცხადების სხვადასხვა დრო განისაზღვრა.
გაეტა იტალიაშია — ლაციოს რეგიონში, ლატინის პროვინციაში, ტირენიის ზღვის სანაპიროზე, რომსა და ნეაპოლს შორის მდებარე საკურორტო ქალაქია