ორი სამზარეულოს დანით შეიარაღებულმა ქალმა ნიუ-იორკის თაიმს-სქვერზე ერთი ადამიანი მოკლა და კიდევ ერთი დაჭრა, რის შემდეგაც პოლიციამ მას ცეცხლი გაუხსნა და სასიკვდილოდ დაჭრა. ხელისუფლების განცხადებით, თავდასხმა შემთხვევითი და არაპროვოცირებული იყო.
თავდასხმა ადგილობრივი დროით 16:30 საათამდე ცოტა ხნით ადრე, One Times Square-ის შენობასთან მდებარე პოლიციის ქვეგანყოფილების სიახლოვეს მოხდა. სწორედ ამ შენობასთან იმართება ყოველწლიურად ახალი წლის ღამეს ცნობილი ბურთის დაშვების ცერემონია.
ნიუ-იორკის პოლიციის კომისრის, ჯესიკა ტიშის განცხადებით, 49 წლის ეჭვმიტანილმა, რომელიც ქუინსში ცხოვრობდა, სავაჭრო ჩანთიდან დანები ამოიღო და მეტროს სადგურიდან მეუღლესთან ერთად გამოსულ 68 წლის მამაკაცი მუცლის არეში დაჭრა.
ამის შემდეგ მან თავს დაესხა 32 წლის ქალს და მასაც მუცლის არეში მიაყენა ჭრილობა.
ორივე დაშავებული საავადმყოფოში გადაიყვანეს. ახალგაზრდა ქალი მიღებული ჭრილობების შედეგად გარდაიცვალა, ხოლო 68 წლის მამაკაცის მდგომარეობა ამჟამად სტაბილურია, აცხადებენ პოლიციაში.
ტიშის განცხადებით, პოლიციელებმა თავდამსხმელს ალყა შემოარტყეს და სცადეს დაერწმუნებინათ, დანები დაეგდო. შემდეგ მათ ელექტროშოკერი გამოიყენეს, თუმცა ვერც ამან შეაჩერა ქალი.
გავრცელებული ინფორმაციით, ეჭვმიტანილმა პოლიციელებს უთხრა: „არაფერს დავაგდებ, მირჩევნია ორივე მოგკლათ“, რის შემდეგაც აღმართული დანებით მათკენ დაიძრა.
ამის შემდეგ რამდენიმე პოლიციელმა ცეცხლი გახსნა. თვითმხილველის მიერ გადაღებულ ვიდეოში ჩანს, როგორ ეცემა ქალი მიწაზე. პოლიციელებმა მას ხელბორკილები დაადეს და პირველადი დახმარება აღმოუჩინეს, თუმცა მოგვიანებით მისი გარდაცვალება დაადასტურეს.
„ეს იყო უკიდურესად სახიფათო ვითარება, რომელიც თაიმს-სქვერის — მსოფლიოს ერთ-ერთ ყველაზე ხალხმრავალი ადგილის — შუაგულში ვითარდებოდა“, — განაცხადა ტიშმა.
მისი თქმით, თავდასხმა შემთხვევითი და არაპროვოცირებული იყო.
ტიშის განცხადებით, პოლიციის ჩანაწერებში ეჭვმიტანილის ფსიქიკურ ჯანმრთელობასთან დაკავშირებული რამდენიმე შემთხვევა ფიქსირდებოდა, მათ შორის 2018 და 2019 წლებში, თუმცა მანამდე იგი არასოდეს დაუკავებიათ.
გამომძიებლები არ მიიჩნევენ, რომ თავდასხმა ტერორიზმთან იყო დაკავშირებული. პოლიციას მსხვერპლთა ვინაობა ჯერ არ გაუსაჯაროებია — მანამდე, სანამ მათ ოჯახებს მომხდარის შესახებ შეატყობინებენ.
ნიუ-იორკის მერმა, ზოჰრან მამდანიმ პრესკონფერენციაზე განაცხადა: „ვიცით, რომ დღეს მომხდარმა ამ ოჯახების ცხოვრება გაანადგურა და მომდევნო საათების, დღეებისა და კვირების განმავლობაში მათ გვერდით ვიქნებით.“
როგორც მამდანიმ, ისე ტიშმა განსაკუთრებული მადლობა გადაუხადეს შემთხვევის ადგილზე მისულ პოლიციელებს და აღნიშნეს, რომ მათმა მოქმედებებმა, სავარაუდოდ, თავიდან აიცილა უფრო მეტი მსხვერპლი.
ეს წელს თაიმს-სქვერზე დანით თავდასხმის შედეგად ადამიანის დაღუპვის უკვე მეორე შემთხვევაა. მსგავსი თავდასხმა მაისშიც მოხდა. ამასთან, მთლიანად ნიუ-იორკში მკვლელობების მაჩვენებელი მკვეთრად შემცირდა და ბოლო ათწლეულების ერთ-ერთ ყველაზე დაბალ ნიშნულამდე ჩამოვიდა.