მოსკოვის მე-2 დასავლეთის საოლქო სამხედრო სასამართლომ უკრაინის პრეზიდენტის ყოფილ მრჩეველს ალექსეი არესტოვიჩს დაუსწრებლად 11 წლით თავისუფლების აღკვეთა მიუსაჯა „ტერორიზმისკენ საჯარო მოწოდებებისა“ და „რუსეთის შეიარაღებული ძალების გამოყენების შესახებ ცრუ ინფორმაციის გავრცელებისთვის“. ამის შესახებ პარასკევს, 28 აგვისტოს, სასამართლოს პრესსამსახურმა განაცხადა.
საქმის საფუძველი გახდა 2022 წლის 17 მარტს Facebook-სა და Instagram-ში გამოქვეყნებული ჩანაწერები, ასევე YouTube-ზე განთავსებული ვიდეო, რომელშიც რუსეთის სასამართლომ დაინახა მოწოდება „იმ სარკინიგზო ხაზების განადგურებისკენ, რომლებიც რუსული ჯარების გადაადგილებისა და მომარაგებისთვის გამოიყენებოდა“, — ნათქვამია განცხადებაში.
გარდა ამისა, 2022 წლის 8 აპრილს არესტოვიჩმა Telegram-სა და Facebook-ში გამოაქვეყნა ინფორმაცია რუსეთის შეიარაღებული ძალების მიერ კრამატორსკის რკინიგზის სადგურზე განხორციელებული დარტყმის შესახებ, რითაც, ბრალდების თანახმად, „ცრუ ინფორმაცია გაავრცელა“. არესტოვიჩი საერთაშორისო ძებნაშია გამოცხადებული.
არესტოვიჩი განაჩენს ირონიით გამოეხმაურა
სასამართლომ არესტოვიჩს დაუსწრებლად 11 წლით თავისუფლების აღკვეთა მიუსაჯა. ამ ვადიდან სამი წელი მან ციხეში უნდა მოიხადოს, დარჩენილი ნაწილი კი — საერთო რეჟიმის სასჯელაღსრულების კოლონიაში. გარდა ამისა, მას ოთხი წლის განმავლობაში აეკრძალა ინტერნეტში ვებსაიტებისა და არხების ადმინისტრირება.
თავად ალექსეი არესტოვიჩი განაჩენს ირონიით გამოეხმაურა. „რა დახვეწილი „დაფარვის ოპერაციაა“, — დაწერა მან Telegram-ში.
ზელენსკიმ ალექსეი არესტოვიჩს სანქციები დაუწესა
ალექსეი არესტოვიჩმა უკრაინის პრეზიდენტის ოფისის ხელმძღვანელის მრჩევლის თანამდებობა 2023 წლის იანვარში დატოვა. ეს მას შემდეგ მოხდა, რაც მან საჯაროდ გამოთქვა ვარაუდი, რომ დნიპროში საცხოვრებელი სახლი რუსულმა რაკეტამ დაანგრია, რომელიც უკრაინის საჰაერო თავდაცვამ ჩამოაგდო.
მოგვიანებით უკრაინაში მის წინააღმდეგ ორი სისხლის სამართლის საქმე აღიძრა — ერთი „ძალადობის პროპაგანდის“ ბრალდებით, ქალებზე გაკეთებული საჯარო განცხადებების გამო, ხოლო მეორე — „ცრუ ჩვენების“ ბრალდებით, უზენაესი რადის დეპუტატთან რუსული ენის საკითხზე კონფლიქტის გამო.
პრეზიდენტის ოფისის ხელმძღვანელის მრჩევლის თანამდებობის დატოვების შემდეგ არესტოვიჩმა მალე ქვეყანა დატოვა. უკრაინის პრეზიდენტმა ვოლოდიმირ ზელენსკიმ 2025 წლის 1 მაისს ხელი მოაწერა განკარგულებას, რომლითაც არესტოვიჩის წინააღმდეგ პერსონალური ეკონომიკური სანქციები დაწესდა.