ცენტრალური სადაზვერვო სააგენტოს (CIA) დირექტორის, ჯონ რეტკლიფის მოსკოვში ვიზიტი იმდენად გასაიდუმლოებული იყო, რომ ამ მგზავრობის შესახებ თეთრი სახლის ზოგიერთმა მაღალჩინოსანმაც კი არ იცოდა. ამის შესახებ წყაროებზე დაყრდნობით The Wall Street Journal-ი ხუთშაბათს, 27 აგვისტოს წერს.
WSJ-ის წყაროების თქმით, აშშ-ის პრეზიდენტმა დონალდ ტრამპმა პირადად დაავალა რეტკლიფს მოსკოვში გამგზავრება და ამ მისიის შესახებ არ აცნობა არც თავის თანაშემწეებს და არც სამხედრო ხელმძღვანელებს, რომლებიც ჩვეულებრივ მსგავს ვიზიტებზე ინფორმირებულნი იქნებოდნენ.
ვიზიტმა მოულოდნელად დააბნია ევროპელი მაღალჩინოსნებიც, რომლებიც, WSJ-ის წყაროების თქმით, „ვიზიტის შესახებ ცნობების გავრცელების შემდეგ ციებ-ცხელებით ეძებდნენ ინფორმაციას“. ბრიფინგის შემდეგ, ორი ევროპელი მაღალჩინოსნის თქმით, CIA-ს დირექტორმა რუს კოლეგებს დაზვერვის სფეროდან დაუდასტურა, რომ აშშ კვლავ ერთგულია ჩრდილოატლანტიკური ხელშეკრულების იმ მუხლისა, რომლის მიხედვითაც NATO-ს ერთ წევრზე თავდასხმა ყველა წევრზე თავდასხმად ითვლება.
რეტკლიფმა მოსკოვში ასევე განიხილა უკრაინასთან ომის დასრულებაზე მოლაპარაკებების განახლება და კრემლს მოუწოდა, შეწყვიტოს ირანის მხარდაჭერა, განუცხადეს WSJ-ს ამერიკელმა და ევროპელმა ოფიციალურმა პირებმა.
NYT: CIA-ს ხელმძღვანელმა მოსკოვში ვიზიტისას რუსეთის მდგომარეობის „პირქუში შეფასება“ გადასცა
The New York Times-ის ცნობით, რეტკლიფმა მოსკოვში ვიზიტისას რუსეთის ფედერალური უსაფრთხოების სამსახურის (FSB) ხელმძღვანელ ალექსანდრ ბორტნიკოვს გაუზიარა რუსეთის მდგომარეობის „პირქუში შეფასება“ უკრაინის ომში და მოსკოვს მოუწოდა, მოლაპარაკებები დაიწყოს მანამდე, სანამ სამხედრო და ეკონომიკური ვითარება კიდევ უფრო გაუარესდება.
გაზეთის ზოგიერთი წყარო ბორტნიკოვის შუამავლად არჩევას იმით ხსნის, რომ რუსეთის პრეზიდენტი ვლადიმირ პუტინი, როგორც სპეცსამსახურების ყოფილი თანამშრომელი, CIA-ს დირექტორისგან მიღებულ ინფორმაციას შესაძლოა უფრო სანდოდ მიიჩნევდეს, ვიდრე ჩვეულებრივი დიპლომატიური არხებით მიღებულ ცნობებს. NYT ასევე წერს, რომ რეტკლიფსა და ბორტნიკოვს შორის საკომუნიკაციო არხი სხვა არხებისგან დამოუკიდებლად მუშაობს.
NYT-ის მიხედვით, CIA-ს თანამშრომლებს ეჭვი აქვთ, რომ პუტინს ომის მიმდინარეობისა და რუსეთის არმიის დანაკარგების მასშტაბის შესახებ სანდო ინფორმაციას არ აწვდიან. გაზეთი არ ასაჯაროებს იმ გზავნილის შინაარსს, რომელიც რეტკლიფმა ბორტნიკოვს გადასცა, თუმცა აღნიშნავს, რომ ის „ეხმიანებოდა CIA-ს დირექტორის ზოგიერთ საჯარო განცხადებას“.
FSB-ის ხელმძღვანელთან შეხვედრისას CIA-ს დირექტორს მუქარა არ გამოუთქვამს იმ შემთხვევისთვის, თუ პუტინი აშშ-ის გზავნილს უგულებელყოფდა და სამხედრო მოქმედებებს არ შეწყვეტდა. ასევე აღნიშნულია, რომ ბორტნიკოვთან შეხვედრამდე რეტკლიფი უკრაინის წარმომადგენლებს ესაუბრა და დაარწმუნა, რომ მისი მიზანი მოსკოვის პოზიციის შესწავლა იყო და არა კიევის სახელით რაიმე დათმობებზე შეთანხმება.
ჯონ რეტკლიფის მოსკოვში ვიზიტის მიზნის შესახებ ვერსიები განსხვავდება
რეტკლიფი რუსეთში 25 აგვისტოს აშშ-ის სამხედრო-სატრანსპორტო თვითმფრინავით Boeing C-17 Globemaster III ჩავიდა და რამდენიმე საათში ქვეყანა დატოვა. The Washington Post წერდა, რომ CIA-ს ხელმძღვანელის ვიზიტი „სპეცსამსახურებს შორის კონტაქტებს“ უკავშირდებოდა.
მოგვიანებით Politico-მ სამ წყაროზე დაყრდნობით განაცხადა, რომ რეტკლიფის მოსკოვში ვიზიტის მთავარი მიზანი რუსეთისთვის იმის შეტყობინება იყო, რომ აშშ-ის NATO-ს მოკავშირეებზე თავდასხმა დაუშვებელია. კერძოდ, საუბარი შეეხებოდა ესტონეთს, ლატვიასა და ლიეტუვას.
რუსეთის პრეზიდენტის პრესმდივანმა დმიტრი პესკოვმა რეტკლიფის ვიზიტის კომენტირებისას განაცხადა, რომ მას სახელმწიფოს მეთაურთან შეხვედრა არ ჰქონია. რუსეთის საგარეო დაზვერვის სამსახურის (SVR) ხელმძღვანელმა სერგეი ნარიშკინმა კი CIA-ს დირექტორთან შეხვედრა დაადასტურა, თუმცა აღნიშნა, რომ მასში „არაფერია უჩვეულო“.
აშშ-ის პრეზიდენტმა დონალდ ტრამპმაც რეტკლიფის მოსკოვში ვიზიტს „ჩვეულებრივი საქმე“ უწოდა და აღნიშნა, რომ ის ნარიშკინს „ექვს თვეში ერთხელ ან წელიწადში ერთხელ“ ხვდება.