თბილისში, ერთ-ერთ საცხოვრებელ ბინაში, აფხაზი ბლოგერი და აქტივისტი დაურ ბუავა გარდაცვლილი იპოვეს. სათვალთვალო კამერების ჩანაწერებით დგინდება, რომ ის სახლში 23 აგვისტოს შევიდა და მას შემდეგ გარეთ არ გამოსულა. მეზობლებმა სამაშველო ბრიგადა მას შემდეგ გამოიძახეს, რაც კორპუსში უცნაური სუნი იგრძნეს. ცხედარს ექსპერტიზა უტარდება, თუმცა შინაგან საქმეთა სამინისტროს ინფორმაციით, პირველადი დათვალიერებით, მას ძალადობის კვალი არ აღენიშნება.
სოციალურ ქსელებში მას ათასობით გამომწერი ჰყავდა. დაურ ბუავა თბილისში 2021 წლის შემოდგომაზე, ოკუპირებული ტყვარჩელიდან ჩამოვიდა, იმისთვის, რომ საკუთარი თვალით დაენახა რეალობა და დაემსხვრია სოხუმში არსებული ანტიქართული პროპაგანდა.
„ჩემო დებო და ძმებო აფხაზებო. დადგა ის დრო, რომლზეც დიდი ხანია გესაუბრებოდით, ხელის გულზე გიჩვენებდით, რომ თქვენ გამზადებდნენ სრული შთანთქმისთვის და დღეს თქვენ უკვე გართმევენ თქვენს აზრს. საკვანძო გადაწყვეტილებებს მიიღებენ არა აფხაზეთში, არამედ მის გარეთ, მოსკოვში, რომელიც ყველაფერს გააკონტროლებს. აფხაზი ახალგაზრდობა ამ სისტემის მძევალი ხდება. მომავლის ნაცვლად მათ თავს ახვევენ დამოკიდებულებას. ბევრი აფხაზი იტყვის, რომ არ ვარ მართალი, რომ ეს რუსეთის მხრიდან მხარდაჭერაა, მაგრამ ეს არ არის დახმარება, ეს იზოლაციაა.
ე.წ. ახალ აფხაზურ მთავრობაში, ბევრი რუსეთიდანაა. სწორედ ისინი გააკონტროლებენ საინფორმაციო ველს, ფინანსებს, ქუჩებს, კანონებს. ხედავთ ალბათ, რას აკეთებს ბადრა გუმბა – რუსეთიდან მოდიან „ნამესტნიკები“, რომლებიც აფხაზებს მხოლოდ მეორე ხარისხის მომსახურე პერსონალის ფუნქციას უტოვებენ“ – ამბობდა თავის ვიდეოებში დაურ ბუავა.
2022 წელს საქართველოს ხელისუფლებამ დაურ ბუავას მოქალაქეობა გამარტივებული წესით მიანიჭა. მალევე მან დააფუძნა ახალგაზრდული მოძრაობა „ამრა“ და ამ პლატფორმიდანაც ღიად მოუწოდებდა აფხაზებს, აეღოთ საქართველოს მოქალაქეობა, ესარგებლათ უფასო ჯანდაცვითა და განათლებით. 2023 წლის ნოემბერში კი ის სიტყვით გამოვიდა სტრასბურგში, ევროპის საბჭოს ორგანიზებით გამართულ „მსოფლიო ფორუმზე დემოკრატიისთვის“, ასევე 2023 წლის ივლისში, ევროპარლამენტში, საერთაშორისო კონფერენციაში მონაწილეობდა.
„ეს კონფლიქტი უკვე 30 წელია, რაც აფხაზეთის მოსახლეობას, აფხაზ ახალგაზრდობას საინფორმაციო ვაკუუმში ტოვებს. ინფორმაცია მწირია… ბავშვობიდანვე მათ ჩასძახიან, რომ ქართველი ხალხი აფხაზების მტერია. მე თავად აფხაზი ვარ, აფხაზეთიდან, და უკვე ორი წელია თბილისში ვცხოვრობ. ბევრი რამ დავინახე და ბევრი რამ გავიგე. მესმის, რომ დღეს ქართული მხარე რეალურად უწვდის დახმარების ხელს აფხაზ მოსახლეობას. აფხაზური ენა საქართველოს კონსტიტუციაშიც კი არის შეტანილი და ქართული ენის თანასწორად დგას. თუმცა, ჩვენი ახალგაზრდობა ნაკლებადაა ინფორმირებული. მათ მხოლოდ იმას ეუბნებიან, რაც უნდა იცოდნენ… და ამას აკეთებს მესამე მხარე, რომელმაც, პრინციპში, პროვოცირება გაუკეთა კიდეც ამ კონფლიქტს 30 წლის წინ და ეს იყო რუსეთი“ – განაცხადა დაურ ბუავამ ბრიუსელში, ევროპარლამენტში გამართულ კონფერენციაზე „მდგრადი მშვიდობა სამხრეთ კავკასიის რეგიონში“.
დაურ ბუავას აქტივობები სოხუმის საოკუპაციო რეჟიმიმმა ღალატად შეაფასა და 2022 წელს მის წინააღმდეგ სამშობლოს ღალატის მუხლით სისხლის სამართლის საქმეც აღძრა. ისევე როგორც, მის საქმიანობას, დაურ ბუავას გარდაცვალებასაც, აფხაზურ საზოგადოებასა და პრორუსულ საინფორმაციო სივრცეში რადიკალური და ნეგატიური გამოხმაურება აქვს. ისინი ხაზს უსვამენ, რომ ბუავა ანტიაფხაზურ და პროქართულ პროპაგანდას ეწეოდა. მაგალითად, რუსული საინფორმაციო სააგენტო Eurasia Daily, რომელსაც პირდაპირი კავშირი აქვს კრემლის საგარეო პოლიტიკურ და პროპაგანდისტულ ხაზთან, დღეს აქვეყნებს ინფორმაციას სათაურით – „აფხაზეთის მოღალატე თბილისში სახლში გარდაცვლილი იპოვეს“.
დაურ ბუავა 30 წლის ასაკში გარდაიცვალა. გამოძიებამ უნდა გასცეს პასუხი კითხვას — რა გახდა სიკვდილის მიზეზი. საქმე ჯერჯერობით თვითმკვლელობამდე მიყვანის მუხლით არის აღძრული.
„სოციალური სამართლიანობის ცენტრის“ დირექტორი, თამთა მიქელაძე სოციალურ ქსელში წერს, რომ დაურს იცნობდა და როგორც იცის, თავისი პოზიციის გამო ის ბევრ მუქარასაც იღებდა. ამიტომ, შესაძლო ძალადობის მიზეზი და გარემოებები სათანადოდ უნდა იყოს გამოძიებული.