ფრანკფურტის აეროპორტის ორი თანამშრომელი მალარიით გარდაიცვალა

პირველი ლეტალური შემთხვევა ჯერ კიდევ ივლისის დასაწყისში დაფიქსირდა, თუმცა ის, რომ ორივე შემთხვევაში სიკვდილის მიზეზი მალარია იყო, მხოლოდ მას შემდეგ დადგინდა, რაც აგვისტოში მეორე მსგავსი შემთხვევა მოხდა. ამის შესახებ ოთხშაბათს, 26 აგვისტოს, ფრანკფურტის ჯანდაცვის უწყებამ განაცხადა.

იმავე დღეს, 26 აგვისტოს, აეროპორტის მეორე თანამშრომლის მალარიით გარდაცვალების შესახებ აეროპორტის მმართველმა კომპანია Fraport-მაც გაავრცელა ინფორმაცია. სავარაუდოდ, ინფიცირება იმ კოღოების ნაკბენის შედეგად მოხდა, რომლებიც გერმანიაში იმ თვითმფრინავის ბორტზე მოხვდნენ, რომელიც ინფექციის გავრცელების რეგიონში იმყოფებოდა. ჯანდაცვის უწყების მონაცემებით, საუბარია ტროპიკულ მალარიაზე — დაავადების ყველაზე საშიშ ფორმაზე.

ამ დროისთვის ფრანკფურტში მალარიით ინფიცირების სულ ექვსი შემთხვევაა გამოვლენილი. გაზეთ Frankfurter Allgemeine Zeitung-ის ინფორმაციით, მამაკაცი, რომელიც აგვისტოში გარდაიცვალა, თვითმფრინავების მომსახურების სფეროში მუშაობდა.

მალარიით ინფიცირება კოღოს ნაკბენის შემდეგ

Fraport-მა თანამშრომლებისთვის მალარიის შესახებ ფართომასშტაბიანი საინფორმაციო კამპანია დაიწყო. კომპანიაში ვარაუდობენ, რომ ყველა შემთხვევაში ინფექცია კოღოს საშუალებით გავრცელდა და არა ადამიანიდან ადამიანზე.

მალარიის შემთხვევაში ადამიანიდან ადამიანზე გადაცემა უკიდურესად იშვიათია და შესაძლებელია მხოლოდ ინფიცირებული სისხლის გადასხმის ან დაბინძურებული ნემსით დაზიანების შემთხვევაში.

Fraport-ის პრესსამსახურის ინფორმაციით, რამდენიმე კვირის წინ აეროპორტში კოღოების სპეციალური ხაფანგებიც დაამონტაჟეს. დაჭერილ მწერებს ანტვერპენის ტროპიკული მედიცინის ინსტიტუტში აგზავნიან, რათა დაადგინონ, არიან თუ არა ისინი ინფექციის მატარებლები და რომელი რეგიონიდან მოხვდნენ გერმანიაში.

თანამშრომლების გაფრთხილება და კოღოების ხაფანგები

ამასთან, ჟურნალისტების ხელში აღმოჩნდა ფრანკფურტის აეროპორტის თანამშრომლებისთვის განკუთვნილი შიდა ინსტრუქცია, რომელიც ივლისის შუა რიცხვებით თარიღდება.

ტვირთების, ტექნიკური მომსახურების სფეროში ან ტერმინალის შენობასა და ასაფრენ-დასაფრენ ბილიკებს შორის ტერიტორიაზე მომუშავე პერსონალს რეკომენდაცია მისცეს, სიცხისა და ცხელების სიმპტომების შემთხვევაში აუცილებლად მიმართონ ექიმს და მიუთითონ „აეროპორტში მალარიით ინფიცირების“ შესაძლო ვარიანტზე.

დიაგნოზთან დაკავშირებით ეჭვის არსებობის შემთხვევაში პაციენტებს ურჩევდნენ, მიემართათ ტროპიკულ დაავადებებზე სპეციალიზებული სამედიცინო დაწესებულებისთვის, მაგალითად, ფრანკფურტის საუნივერსიტეტო კლინიკისთვის.

მალარია განსაკუთრებით გავრცელებულია აფრიკაში, აზიასა და სამხრეთ ამერიკაში. რობერტ კოხის ინსტიტუტის მონაცემებით, ბოლო წლებში გერმანიაში ყოველწლიურად მალარიით ინფიცირების 500-დან 600-მდე შემთხვევა ფიქსირდებოდა, რომლებიც ქვეყანაში საზღვარგარეთიდან იყო შემოტანილი.