აშშ-ის თავდაცვის სამინისტრო ნიდალ ჰასანის სიკვდილით დასჯის პირდაპირ ეთერში გადაცემას გეგმავს, — ამის შესახებ Reuters-ი იუწყება. ჰასანი არმიის ყოფილი მაიორი და სამხედრო ფსიქიატრია, რომელსაც 2009 წელს ფორტ ჰუდის სამხედრო ბაზაზე 13 ადამიანის მკვლელობისთვის სიკვდილით დასჯა მიუსაჯეს.
56 წლის ჰასანის სიკვდილით დასჯა 3 დეკემბერს, ტეხასის იმავე სამხედრო ბაზაზეა დაგეგმილი, სადაც მან თავდასხმა განახორციელა. აღსრულების დრო — 13:00 საათი — ასევე ემთხვევა 2009 წელს მომხდარი თავდასხმის დროს. ჰასანი 1945 წლის შემდეგ პირველი სამხედრო იქნება, რომელსაც აშშ-ის არმია დახვრეტით დასჯის.
აშშ-ის თავდაცვის მდივანმა პიტ ჰეგსეთმა დაადასტურა, რომ სიკვდილით დასჯის პირდაპირ ეთერში ჩვენება იგეგმება. მისი განცხადებით, საზოგადოებას პროცესის ნახვის შესაძლებლობა ექნება, რათა მსგავსი დანაშაულების შედეგები ნათელი გახდეს. კითხვაზე, ჰქონდა თუ არა მსჯავრდებულს რაიმე საბოლოო თხოვნა, ჰეგსეთმა უპასუხა: „არ მაინტერესებს. მას 3 დეკემბერს შევხვდებით“.
ექსპერტების შეფასებით, სახელმწიფო ორგანოების მიერ კანონიერად აღსრულებული სიკვდილით დასჯის პირდაპირი სატელევიზიო ან ინტერნეტტრანსლაციის მსგავსი პრეცედენტი მსოფლიოში ცნობილი არ არის. აშშ-ში საჯარო სიკვდილით დასჯა ბოლოს 1936 წელს ჩატარდა.
ჰასანს სიკვდილით დასჯა სამხედრო ნაფიც მსაჯულთა სასამართლომ 2013 წლის აგვისტოში მიუსაჯა. იგი დამნაშავედ ცნეს წინასწარი განზრახვით ჩადენილ მკვლელობასა და მკვლელობის მცდელობის 45 ეპიზოდში. დაკავებისას პოლიციის მიერ მიყენებული ცეცხლსასროლი ჭრილობის შედეგად ჰასანი ნაწილობრივ პარალიზებულია და გადაადგილებისთვის ეტლს იყენებს.