აშშ-სა და რუსეთს შორის დიზელის შესახებ შეთანხმება მოსკოვს უკრაინაში „ომის საწარმოებლად დამატებით შემოსავალს“ მოუტანს, განაცხადა კაია კალასმა. მისი თქმით, ევროკავშირი რუსეთის წინააღმდეგ „ომის დაწყების შემდეგ ყველაზე მასშტაბურ სანქციების პაკეტს“ ამზადებს.
აშშ-ის მიერ რუსულ დიზელის საწვავზე სანქციების დროებით შეჩერება რუსეთს უკრაინის წინააღმდეგ „ომის საწარმოებლად დამატებით შემოსავალს“ მისცემს, განაცხადა შაბათს, 10 ოქტომბერს, ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში კაია კალასმა.
„ახლა რუსეთზე ზეწოლის შესუსტების დრო არ არის და ევროპა ამას არ გააკეთებს. ორშაბათს ევროკავშირის ქვეყნების საგარეო საქმეთა მინისტრები გეგმავენ ომის დაწყების შემდეგ ყველაზე მასშტაბური სანქციების პაკეტის დამტკიცებას, რომელიც რუსეთის სამხედრო მანქანის წინააღმდეგ იქნება მიმართული“, — დაწერა კალასმა სოციალურ ქსელ X-ში, აშშ-სა და რუსეთს შორის წინა დღეს გამოცხადებული დიზელის შეთანხმების კომენტირებისას.
დიპლომატმა თავის პოსტში ასევე აღნიშნა, რომ ბოლო ორი დღის განმავლობაში „რუსეთის დარტყმების შედეგად უკრაინაში 80-ზე მეტი მშვიდობიანი მოქალაქე დაიღუპა“. მისი თქმით, მოსკოვმა ასევე „გააძლიერა ჰიბრიდული თავდასხმები ევროპაზე“, მათ შორის ნატოს წევრ სახელმწიფოებზე.
ტრამპი და პუტინი რუსული დიზელის აშშ-სა და სხვა ქვეყნებში მიწოდებაზე შეთანხმდნენ
9 ოქტომბრის საღამოს აშშ-ის პრეზიდენტმა დონალდ ტრამპმა, რუსეთის პრეზიდენტ ვლადიმირ პუტინთან სატელეფონო საუბრის შემდეგ, განაცხადა, რომ მიღწეულია შეთანხმება რუსული დიზელის შეერთებულ შტატებსა და მსოფლიო ბაზარზე მიწოდების შესახებ.
თეთრი სახლის ხელმძღვანელის თქმით, რუსეთი „დაუყოვნებლივ მიაწვდის 300 000 ტონაზე მეტ დიზელის საწვავს ამერიკულ და მსოფლიო ბაზრებს, კიდევ 500 000 ტონას — ნოემბრის განმავლობაში, ხოლო შემდეგ — დამატებით 1 000 000 ტონას“.
შემდგომში, რუსული ნავთობგადამამუშავებელი ქარხნების მდგომარეობიდან გამომდინარე, მოსკოვმა მოკლე ვადებში კიდევ სამი მილიონი ტონა საწვავის მიწოდება უნდა უზრუნველყოს, განაცხადა აშშ-ის პრეზიდენტმა. კრემლმა შეთანხმება დაადასტურა.
გარიგების განსახორციელებლად აშშ-ის ფინანსთა სამინისტრომ გასცა ლიცენზია, რომელიც რუსულ დიზელთან დაკავშირებული და მანამდე სანქციებით აკრძალული ოპერაციების ჩატარებას უშვებს. ლიცენზია 2027 წლის 7 აპრილამდე იმოქმედებს. რუსეთის ხელისუფლებამ კი ამ ტიპის საწვავის ექსპორტზე დაწესებული შეზღუდვები ვადაზე ადრე მოხსნა.
უკრაინის პრეზიდენტმა ვოლოდიმირ ზელენსკიმ აშშ-სა და რუსეთს შორის შეთანხმებას „ომში ინვესტიცია“ უწოდა და ვაშინგტონს მოსკოვზე ზეწოლის გაძლიერებისკენ მოუწოდა, რათა ცეცხლის შეწყვეტა გახდეს შესაძლებელი.
„უკრაინა არ დაწვავს რუსეთის ნავთობგადამამუშავებელ ინფრასტრუქტურას, თუ რუსეთი ჩვენს ენერგეტიკას არ გაანადგურებს. სწორედ ასეთ შეთანხმებას ვთავაზობთ ამერიკას და მიგვაჩნია, რომ შეერთებული შტატების ძალა საკმარისია ასეთი კომპრომისის მისაღწევად“, — განაცხადა უკრაინის ლიდერმა.