ხედავს თუ არა ევროკავშირის ელჩი „ქართული ოცნების“ რაიმე მზაობას – აღადგინონ ურთიერთობა ევროკავშირთან? პაველ ჰერჩინსკის ეს კითხვა ჟურნალისტებმა დაუსვეს. ელჩი ამბობს, რომ ევროკავშირის მოწოდებები „ქართული ოცნებისადმი“, უგულებელყოფილია და პირიქით, ოფიციალური თბილისის მხრიდან ევროკავშირზე უპრეცედენტო თავდასხმა ხორციელდება.
„სამწუხაროდ, მთავრობა არ უსმენს იმას, რასაც ევროკავშირი ამბობს. საშუალება მომეცით შეგახსენოთ, რომ ევროპული საბჭოს პირველი დასკვნები, რომლებიც მოუწოდებდნენ საქართველოს კურსი შეეცვალა, გამოქვეყნებული იყო 2024 წლის ივნისში. უკვე ორ წელიწად-ნახევარია, რაც საქართველოს ხელისუფლებას მოვუწოდებთ, ტრაექტორია შეცვალონ თუ, რა თქმა უნდა, სერიოზულად დაინტერესებული არიან ოდესმე ევროკავშირში გაწევრიანებით.
ასე რომ, 2024 წლის ივნისში საბჭოს ძალიან ნათელი დასკვნები გქონდათ, რომლებიც ევროკავშირის ყველა წევრი სახელმწიფოს მიერ იყო შეთანხმებული. რა უნდა გააკეთოს საქართველოს ხელისუფლებამ? 2024 წლის ოქტომბერი, 2024 წლის დეკემბერი – გაფართოებაზე თავმჯდომარეობის უახლესი დასკვნები წინა წლის დეკემბერშია გამოქვეყნებული, პარაგრაფი 138. შეგიძლიათ ნახოთ და წაიკითხოთ საქართველოს ხელისუფლებამ ზუსტად რა უნდა გააკეთოს, რათა დაუბრუნდეს ევროინტეგრაციის ტრაექტორიას.
ყველა ჩვენი მოწოდება უგულებელყოფილ იქნა. პირიქით, როგორც ცოტა ხნის წინაც წავიკითხე, ბოლო დღეებში უპრეცედენტო თავდასხმაა ევროკავშირზე, ევროკავშირის ინსტიტუტებზე, ევროპარლამენტზე, ევროკავშირის ინსტიტუტების ლიდერებზე. ეს ძალიან სამწუხაროა ჩემთვის, გულდასაწყვეტია, მაგრამ ეს დღევანდელი რეალობაა“, – – განაცხადა ჰერჩინსკიმ.
მისივე თქმით, ევროკავშირის საგარეო საქმეთა მინისტრები 12 ოქტომბერს „საქართველოში ვითარების გაუარესებას განიხილავენ“.
„ევროკავშირის საგარეო საქმეთა მინისტრები ორშაბათს გამართავენ შეხვედრას და საქართველოში არსებულ ვითარებას განიხილავენ. სინამდვილეში, ევროკავშირის საგარეო საქმეთა მინისტრები საკმაოდ რეგულარულად განიხილავენ საქართველოს. რატომ? ვინაიდან აშკარად შეშფოთებულები ვართ თქვენ ულამაზეს ქვეყანაში მოვლენებით. შეშფოთებულები ვართ ადამიანის უფლებების მხრივ არსებული ვითარების გაუარესებაზე, შეშფოთებულები ვართ დემოკრატიის მდგომარეობაზე.
ძალიან კარგად იცით, რომ დღევანდელ საქართველოში ხალხი ციხეში მიდის ტროტუარზე დგომისთვის. ხალხი ციხეში მიდის „ფეისბუქზე“ პოსტებისთვის. ევროკავშირისა და წევრი სახელმწიფოების ფონდები, რომლებიც ყოველთვის უჭერდნენ მხარს საქართველოს სუვერენიტეტსა და განვითარებას, საქართველოდან იდევნებიან. ეს, რა თქმა უნდა, უკიდურესად პრობლემურია და ამიტომ, კიდევ ერთხელ, შემდეგ ორშაბათს მინისტრები განიხილავენ საქართველოში ვითარების გაუარესებას“, – განაცხადა ელჩმა.
სამ კვირაში კი ჰერჩინსკის ინფორმაციით, გამოქვეყნდება ევროკომისიის გაფართოების ანგარიში და თუ წინა ანგარიში გამანადგურებელი იყო საქართველოსთვის, მას შემდეგ ვითარება კიდევ უფრო გაუარესდა.
„სამწუხაროდ, რაც გაფართოების საკითხებში ევროკომისარმა, მარტა კოსმა თქვა, გულდასაწყვეტია და პერსონალურად ძალიან მამწუხრებს, მაგრამ ეს ამჟამინდელი მთავრობის თანმიმდევრული ქმედებების, კანონმდებლობების და ანტი-ევროპული რიტორიკის შედეგია. სამწუხაროდ, შედეგებია და როდესაც საქმე გაფართოების პროცესს ეხება, სამ კვირაში ევროკომისია გაფართოების კიდევ ერთ ანგარიშს წარადგენს. მე კიდევ ერთ პრესკონფერენციას დავაორგანიზებ. უმაღლეს წარმომადგენელსა და გაფართოებაზე პასუხისმგებელ ევროკომისარს ბრიუსელში ექნებათ პრესკონფერენცია და მოდი, დაველოდოთ ზუსტად რა იქნება მესიჯი.
ბოლო გაფართოების ანგარიში, რომელიც გასული წლის ნოემბერში გამოქვეყნდა, სამწუხაროდ, გამანადგურებელი იყო საქართველოსთვის. ბოლო ერთი წლის განმავლობაში ვითარება არ გაუმჯობესებულა, პირიქით – კიდევ უფრო გაუარესდა, როდესაც საქმე ეხება ფუნდამენტურ თავისუფლებებს. ასე რომ, მოდი სამ კვირაში ვნახოთ, რა იქნება ევროკომისიის შეფასება“, – განაცხადა პაველ ჰერჩინსკიმ.
ელჩი ამბობს, რომ მიუხედავად ყველაფრისა, ევროკავშირი გააგრძელებს საქართველოს დემოკრატიული და ევროპული მომავლის მხარდაჭერას.
„ევროკავშირი ქართულ მრავალხმიანობას ჰგავს. 27 დამოუკიდებელი სახელმწიფო ძლიერ ერთობას ქმნის, ისევე, როგორც თითოეული ხმა ქმნის ერთიან მელოდიას. ჩვენ გვსურს, რომ ევროპის მრავალხმიანობაში ქართული ხმა მკაფიოდ ისმოდეს. ევროკავშირისა და საქართველოს მეგობრობა საქართველოს დამოუკიდებლობიდან იწყება, მართალია ამ მჭიდრო კავშირს ბოლო პერიოდის ანტიევროპული რიტორიკა ძალიან აზიანებს, თუმცა ვერ შეცვლის! წარმოუდგენელია მრავალწლიანი ისტორიის გადაწერა, მით უფრო დავიწყება რამდენიმე წელში. ჩვენ გავაგრძელებთ საქართველოს დემოკრატიული და ევროპული მომავლის მხარდაჭერას“, – განაცხადა პაველ ჰერჩინსკიმ.
ეს განცხადებები საქართველოში ევროკავშირის ელჩმა თელავში გააკეთა, სადაც ევროკავშირის წარმომადგენლობის ორგანიზებული ღონისძიება „ევროპის დღე 2026“ გაიმართა.