რუსეთის პრეზიდენტმა ვლადიმირ პუტინმა განაცხადა, რომ უკრაინაში ომის გაგრძელების ფონზე, ფრონტზე მოწინააღმდეგისთვის ვითარების გართულებასთან ერთად, კიევი, მისი შეფასებით, უფრო სასტიკ და ბარბაროსულ თავდასხმებს ახორციელებს.
ამის შესახებ პუტინმა 22 აგვისტოს მოსკოვში, პარტია „ერთიანი რუსეთის“ XXIII ყრილობის მეორე ეტაპზე გამოსვლისას განაცხადა. მისი თქმით, „სპეციალური სამხედრო ოპერაცია“ გრძელდება და ფრონტზე ვითარების გაუარესების პარალელურად უკრაინის მხრიდან თავდასხმები უფრო მკაცრი ხდება. პუტინმა ამ კონტექსტში უკრაინის ხელისუფლებას „ნეონაცისტური, ბანდერისტული და რუსოფობიური“ ძალა უწოდა.
„გრძელდება სპეციალური სამხედრო ოპერაცია და რაც უფრო რთულია მოწინააღმდეგისთვის ფრონტზე არსებული სიტუაცია, მით უფრო სასტიკ, ბარბაროსულ თავდასხმებს ახორციელებს კიევის რეჟიმი. სწორედ ამაშია ნეონაცისტური, რუსოფობიური არსი იმ ძალის, ვისაც ჩვენ ვებრძვით” – თქვა პუტინმა საკუთარი პარტიის ყრილობაზე სიტყვით გამოსვლისას.
რუსეთის პრეზიდენტმა ასევე ისაუბრა ქვეყნის პოლიტიკურ სისტემასა და მომავალ არჩევნებზე. მისი განცხადებით, ხალხი ხელისუფლების წყაროა, ხოლო მოქალაქეების კონსტიტუციური უფლება, განსაზღვრონ ქვეყნის განვითარების გზა, ურყევი უნდა იყოს.
პუტინის თქმით, რუსეთი „ყველაზე რთულ პირობებშიც“ არ გადაუხვევს სახალხო მმართველობის პრინციპებს და არჩევნებს ქვეყნის მასშტაბით ჩაატარებს. მან ასევე გამოთქვა რწმენა, რომ მომავალი არჩევნები სახელმწიფოს მდგრადობასა და რუსეთის პოლიტიკური სისტემის სიმწიფეს დაადასტურებს.
პუტინის განცხადებით, არჩევნები ასევე უნდა გახდეს მილიონობით მოქალაქის საერთო ნების გამოხატულება და აჩვენოს მათი სურვილი, უზრუნველყონ რუსეთის სუვერენიტეტი და უსაფრთხოება.
რუსეთში მომავალი არჩევნები სექტემბერშია დაგეგმილი. პუტინმა „ერთიან რუსეთს“ არჩევნებში წარმატებაც უსურვა და პარტიის მხარდაჭერა დააფიქსირა.
მისი გამოსვლა აერთიანებდა როგორც უკრაინაში მიმდინარე ომთან დაკავშირებულ მკაცრ განცხადებებს, ისე რუსეთის შიდა პოლიტიკურ დღის წესრიგს — კერძოდ, არჩევნებსა და ხელისუფლების მიერ ქვეყნის პოლიტიკური სისტემის მდგრადობის ხაზგასმას.