პარლამენტის უსაფრთხოების კომიტეტი აპირებს სლოვენიის სადაზვერვო სამსახურს, SOVA-ს, მოსთხოვოს ინფორმაცია პრეზიდენტ ნატაშა პირც-მუსარის რუსეთის სადაზვერვო ქსელთან შესაძლო კავშირების შესახებ. ერთ-ერთმა დეპუტატმა უკვე მოითხოვა, რომ პრეზიდენტს დროებით შეუჩერდეს წვდომა სადაზვერვო და საიდუმლო ანგარიშებზე.
ეჭვების საფუძველი პრეზიდენტის ძველი მეგობარი ვიქტორია კრივოლუცკაიაა — რუსული წარმოშობის სლოვენიის მოქალაქე. მედიამ გაარკვია, რომ წარსულში მას ურთიერთობა ჰქონდა სლოვენიის დაზვერვის ყოფილ თანამშრომელ რომან ეგლიჩთან, რომელიც 1990-იან წლებში რუსეთში გაიქცა. თავად კრივოლუცკაია აცხადებს, რომ მასთან უკვე 15 წელზე მეტია აღარ ჰქონია ურთიერთობა.
დეტალები, რომლებზეც მედია საუბრობს:
ყველაფერი 31 ივლისს პრეზიდენტის სამსახურებრივი ავტომობილის ავარიის შემდეგ დაიწყო. მანქანაში პირც-მუსართან ერთად აღმოჩნდა მისი უახლოესი მეგობარი ვიქტორია კრივოლუცკა, რომელიც რუსეთში, კრასნოიარსკშია დაბადებული და სლოვენიის მოქალაქეობაც აქვს. პრეზიდენტი ამბობს, რომ ისინი თითქმის 20 წელია მეგობრობენ და ერთად ბოულინგსაც თამაშობენ. კრივოლუცკას ბიზნესკავშირიც აქვს პრეზიდენტის ოჯახთან — ის დღემდე პროკურისტია კომპანია Ruska dača-ში, რომელიც პირც-მუსარის მეუღლემ, ალეშ მუსარმა დააფუძნა.
ამის შემდეგ სლოვენიურმა Dnevnik-მა და ავსტრიულმა APA-მ რუსული საჯარო ბაზები შეისწავლეს და აღმოაჩინეს, რომ 2009 წელს კრივოლუცკა და რომან ეგლიჩი კრასნოიარსკში ერთსა და იმავე მისამართზე იყვნენ რეგისტრირებული. კრივოლუცკამ მოგვიანებით თავად დაადასტურა, რომ ისინი რამდენიმე წლის განმავლობაში წყვილი იყვნენ და გარკვეული პერიოდი ერთად ცხოვრობდნენ. მისი თქმით, მაშინ არ იცოდა, რომ ეგლიჩს სადაზვერვო სამსახურში მუშაობის წარსული ჰქონდა და მასთან 15 წელზე მეტია კონტაქტი აღარ აქვს.
ეგლიჩის ფიგურა ამ ამბავში ყველაზე საინტერესო ნაწილია. ის უბრალო ყოფილი თანამშრომელი არ ყოფილა: დამოუკიდებლობის შემდეგ სლოვენიის პირველი უშიშროების სამსახურის — VIS-ის — დირექტორის მოადგილე იყო. უფრო ადრე, 1988 წელს, პოლიციაში მუშაობისას მან ხელი მოაწერა განცხადებას, რომელსაც იანსა-ს ცნობილი JBTZ საქმისა და დაკავების პროცესთან აკავშირებენ. 1990-იანებში მისი სახელი გახმაურებულ ფინანსურ პირამიდა Catch the Cash-საც უკავშირდებოდა, რის შემდეგაც რუსეთში გადავიდა. მოგვიანებით რუსეთში სლოვენიური კომპანია Gorenje-ს წარმომადგენელი იყო — თვით Gorenje-ს ძველ წლიურ ანგარიშშიც Roman Jeglič კრასნოიარსკის წარმომადგენლობის დირექტორად არის მითითებული.
კიდევ ერთი რამ, რამაც პოლიტიკური ინტერესი გაზარდა: Dnevnik/APA-ს მონაცემებით, პირც-მუსარი 2015-2022 წლებში კრივოლუცკასთან ერთად სულ მცირე შვიდჯერ იმყოფებოდა რუსეთში. ბოლო ვიზიტი მოსკოვში 2021 წლის ბოლოს, 2022 წლის ახალი წლის შესახვედრად იყო — რუსეთის მიერ უკრაინაში სრულმასშტაბიანი შეჭრიდან დაახლოებით ორი თვით ადრე. პრეზიდენტის ოფისი ამბობს, რომ ეს იყო კერძო ტურისტული ვიზიტები ოჯახთან და მეგობრებთან ერთად და პრეზიდენტს ეგლიჩი არც პირადად უნახავს და არც იცნობს.
პრეზიდენტის ადმინისტრაციაში რუსეთის დაზვერვასთან კავშირების შესახებ ყველა ბრალდებასა და ეჭვს უარყოფენ.
თუმცა საქმე უკვე გადაიზარდა პოლიტიკურ სკანდალში. მმართველი SDS-ის დეპუტატმა ჟან მაჰნიჩმა მოითხოვა, რომ საკითხის გარკვევამდე პრეზიდენტისთვის SOVA-სა და სამხედრო დაზვერვის საიდუმლო ანგარიშების მიწოდება შეწყდეს. პრეზიდენტის ოფისმა ეს მოთხოვნა მკაცრად უარყო და აღნიშნა, რომ პრეზიდენტს საიდუმლო ინფორმაციაზე წვდომა კანონით აქვს.