ვენესუელაში დროებით მთავრობასა და ოპოზიციას შორის მოლაპარაკებების პირველი რაუნდის შემდეგ 131 პოლიტპატიმარი გაათავისუფლეს.
ქვეყნის მთავრობის განცხადებით, გათავისუფლებული პირები მანამდე დაკავებული იყვნენ „დანაშაულებში სავარაუდო ან დადასტურებული მონაწილეობის გამო“, ამიტომ მათ მიმართ „თავისუფლების შეზღუდვის ალტერნატიული ზომები“ იქნა გამოყენებული. Reuters-ის ცნობით, ვენესუელას ხელისუფლებას ჯერ არ დაუკონკრეტებია, კონკრეტულად რას გულისხმობს ეს ალტერნატიული ზომები.
„ყველა არ გაუთავისუფლებიათ, თუმცა ყველა პოლიტპატიმარი სრულ თავისუფლებას იმსახურებს. მოდი, დაუღალავად გავაგრძელოთ ამის მოთხოვნა, სანამ თითოეული მოქალაქე საკუთარ ოჯახს არ დაუბრუნდება“, — განაცხადა პოლიტიკოსმა დინორა ფიგერამ, რომელიც ვენესუელის მთავრობასთან მოლაპარაკებებში ოპოზიციის დელეგაციას ხელმძღვანელობს.
აშშ-ის სახელმწიფო მდივანმა მარკო რუბიომ 131 ადამიანის გათავისუფლებას „ეროვნული შერიგებისკენ გადადგმული მნიშვნელოვანი ნაბიჯი“ უწოდა. მან ასევე აღნიშნა, რომ წლის დასაწყისიდან ვენესუელაში უკვე 1046 პოლიტპატიმარია გათავისუფლებული.
აშშ ვენესუელის ხელისუფლებასა და ოპოზიციას შორის მოლაპარაკებებს მხარს უჭერს
მოლაპარაკებების პირველი რაუნდი 12 აგვისტოს დასრულდა. მხარეებმა, სხვა საკითხებთან ერთად, სასამართლო რეფორმაზეც მიაღწიეს შეთანხმებას.
შეერთებული შტატები ვენესუელას ოპოზიციასა და დროებით მთავრობას შორის მოლაპარაკებებს მხარს უჭერს. ვაშინგტონის ზეწოლის შედეგად, ეროვნული დიალოგის დაწყებამდე, ვენესუელას პრეზიდენტის მოვალეობის შემსრულებელმა დელსი როდრიგესმა ხელი მოაწერა ამნისტიის შესახებ კანონს, რომლის საფუძველზეც უკვე რამდენიმე ასეული პოლიტპატიმარი გათავისუფლდა.