The New York Times წერს, რომ კრემლის ბინადრის პარანოია ახალ დონეზე გადავიდა. ახლა პუტინი უპირატესობას ანიჭებს საიდუმლო ჯავშანმატარებელს, რომელიც ჩვეულებრივ სამგზავრო მატარებლად არის შენიღბული. იმისათვის, რომ „უსაფრთხოდ“ გადაადგილდეს, მის რეზიდენციებთან ცალკე სარკინიგზო განშტოებები გაიყვანეს და საიდუმლო სადგურები ააშენეს.
თუმცა ესეც საკმარისი არ აღმოჩნდა. NYT-ის ინფორმაციით, მოსკოვში ახლა სატყუარა კორტეჟებსაც დაატარებენ, რათა დააბნიონ ისინი, ვინც პუტინის გადაადგილებისთვის თვალყურის დევნებას ცდილობს. თავად პუტინი ასეთ კორტეჟში შესაძლოა საერთოდ არ იმყოფებოდეს.
ჟურნალისტები კრემლის კიდევ ერთ ხრიკსაც იხსენებენ: პუტინთან შეხვედრებს წინასწარ იწერენ, შემდეგ კი ტელევიზიით ისე აჩვენებენ, თითქოს ისინი სწორედ იმ მომენტში მიმდინარეობს. რეალურ შეხვედრასა და მის ეთერში გასვლას შორის სხვაობა შეიძლება რამდენიმე კვირა ან თვეც კი იყოს.
საქმე იქამდეც მისულა, რომ ჟურნალისტები გადაღების თარიღის დადგენას უმცირესი დეტალებით ცდილობდნენ — მაგალითად, პუტინის კაბინეტში ოთახის მცენარეების მდგომარეობას ადარებდნენ.
NYT-ის წყაროების თანახმად, საიდუმლოების დაცვის ეს მანია განსაკუთრებით მას შემდეგ გაძლიერდა, რაც უკრაინულმა დრონებმა რუსეთის ტერიტორიის სულ უფრო ღრმა რაიონებამდე დაიწყეს შეღწევა.